Coronavirus, su chi podimus fàghere finas a su 18 de maju in Sardigna Su presidente de sa Regione at fatu un'ordinàntzia noa, ma pro medas fainas ant a dèpere seberare is sìndigos

Dae su 4 de maju si podet andare a missa in crèsia ma cun sa mascarina respetende is distàntzias. Dae s’11 de maju ant a èssere abertas totu is butegas chi faghent servìtzios a sa persone comente barberis, ma fintzas butegas chi bendent bestires.

Dd’at annuntziadu su guvernadore de sa Sardigna Christian Solinas, presentende s’ordinàntzia pro sa Fase 2 de s’Ìsula. “Dae s’ùndighi de maju — at naradu — si is contàgios non torrant a crèschere donamus sa possibilidade a is sìndigos de is Comunos interessados de pòdere torrare a abèrrere atividades comente cussas de is barberis”. In prus, is famìlias chi istant in Sardigna ant a pòdere andare in is segundas domos ma non ddoe ant a pòdere colare sa note.

Is marinas sardas abarrant serradas, nessi pro is tzitadinos, chi pro s’ispostare ant a dèpere semper ammustrare s’autotzertificatzione. “Sa disciplina de s’atzessu a su pùblicu in is istabilimentos e in is marinas lìberas est ogetu de cuntratatzione pro su chi pertocat is lìnias de seguridade”, at craridu Solinas. Pro como “nos preparamus a pòdere retzire is clientes, donende s’oportunidade a is titulares de pòdere fàghere sa manutentzione a is istruturas”.

A s’imbesse torrant a abèrrere supermercados e tzentros cummertziales sa domìniga. “No amus prorogadu sa serrada, ma invitamus totus a sa responsabilidade”. Tra totu is fainas chi s’ant a pòdere fàghere dae su 4 de maju, Solinas at remonadu sa tundimenta de is berbeghes, sa pisca, is servìtzios de is agèntzias immobiliares, s’isbrigu de is pràticas fiscales e automobilìsticas, sa bèndida de materiale pro s’edilìtzia, de ricàmbios pro sa nàutica, e — ma dipendet dae is sìndigos — s’abertura de is mercados de bighinadu.

Is detzisiones de Solinas però non sunt pràghidas a is pìscamos sardos chi “puru apretziende s’atentu de su presidente, ant naradu chi non sunt istados motivados e chi detzisiones de custa casta cumpetent petzi a s’Autoridade eclesiàstica”.

L.M.

Foto de Anna Shvets dae Pexels

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.