Chenàbura 7 de làmpadas cumentzat in Mòguru sa de oto editziones de sa Rassigna de su Tzìnema Sotziale, cun tres addòbios dedicados a film in limba sarda: is projetziones, s’ant a acumprire a sa presèntzia de is registas.
Sa rassigna, organizada dae s’Assòtziu Culturale Arvèschida cun su contributu de sa Fundatzione de Sardigna e in collaboratzione cun s’Assòtziu Culturale BìFoto, faghet parte de sa de XIV editziones de su BìFoto Fest – Fèstival Internatzionale de sa Fotografia e est ghiada dae sa diretzione artìstica de Andrea Cannas cun sa diretzione organizativa curada dae Vittorio Cannas e Lucrezia Degortes.
Sa prima die s’at a tènnere chenàbura 7 de làmpadas, partinde dae is oras 20, in su Beer Garden Bam, s’àrea esterna de su Birrificio Artiginale Mogorese, acanta ant a èssere projetados is curtzumetràgios 12 Aprile (2021), de Antonello Deidda, e Polvere (2023) dirìgidu dae Paolo Carboni e prodùidu dae Terra de Punt.
S’at a sighire chenàbura 12 de trìulas a is 20, semper in su Beer Garden Bam in Mòguru, cun sa su film Island for Rent (2024), curtzumetràgiu iscritu e dirìgidu dae Elio Turnu Arthemalle e Salvatore Cubeddu, prodùidu dae Teatru Impossìbile e Terra de Punt. Ambos eventos ant a èssere presentados dae su regista Daniele Atzeni.
Sa rassigna, chi tenet sa punna de favorire sa cultura tzinematogràfica, promovende in particulare is produtziones sardas, e de creare oportunidades noas in is setores artìsticos a traessu de sa collaboratzione cun àteras realidades de s’ìsula impinnadas in su setore culturale, s’at a concruire in Seui cun un’addòbiu insertadu in su programa de sa de noe editziones de SeuInMusica, fèstival de mùsica organizadu dae s’Assòtziu Culturale Kromatica.
S’eventu s’at a tènnere chenàbura 26 de trìulas partinde dae sas 17:30, a sa Fàbrica de Kimbe, acanta at a èssere projetadu Mira sa Dì (2021), de Andrea Cannas, chi at a èssere presentadu dae su giornalista Andrea Deidda. Prima però b’at a èssere s’inauguratzione de sa mustra fotogràfica “Pinuccio, il viaggio della pietra”, cun is iscatos realizados dae Vittorio Cannas chi re-traent Pinuccio Sciola in su cursu de is ùrtimos annos de sa vida sua. Sa mustra at a èssere visitabile in donu finas a domìniga 28 trìulas.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
