Su festival de tzìnema Visioni Italiane organizadu dae sa Cineteca de Bologna at annuntziadu sos oto finalistas de sa setzione Visioni Sarde, dedicada a sos registas sardos o a òperas giradas in Sardigna.
Lòmpidu a sa de trintuna editziones suas e cun Visioni Sarde presente dae dòighi annos, su fèstival proponet unu sèberu de pellìculas varias chi includet Ajò West! de Sara Corbioli, Brigas de Lorenzo Spinelli, Infanzia e gioventù di Gramsci de Paolo Zucca, Mamma de Matteo Martinez, Su cane est su miu de Salvatore Mereu, True love waits de Simone Cicalò, Una faccia da cinema de Alberto Salvucci e Vida e morti di unu maragotti de Stefano Cau.
Sas òperas, originales e a bortas isperimentales, faeddant de temas intimos ma finas polìticos, dae su gènere western a su sotziale, contant isròrias de infàntzia, lutu e maladia e oferint gasi unu retratu cun medas caras de s’Ìsula.
“Visioni Sarde 2025 est una setzione particulare pro more de sas diversidades istilìsticas e pro sas calidades de sos autores e de sos registas seberados — at naradu Anna Di Martino, diretora artìstica de su fèstival —. Fintzas ocannu sunt presentes giòvanos e autores afirmados cunfirmende Visioni Sarde comente a logu de chirca espressiva e isperimentatzione capatza de barigare sas làcanas regionales”.
Sa premiatzione de sas pellìculas s’at a tènnere su 19 de cabudanni in Roma. De sa giuria faghent parte Marcello Atzeni, Lia Careddu, Gaia Siria Meloni, Simone Pinchiorri, Matteo Porru, Paola Sini. Ocannu su primu prèmiu dd’ant dedicadu a Paolo Pulina esponente de sa Fasi (Federatzione de sos sòtzios sardos in Itàlia) iscomparsu in su 2024. Un’òmine chi at dedicadu sa vida sua a sa promotzione de sa cultura e de sas traditziones sardas.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
