Sighi∙nos

Salude, ite ses chirchende?

Atualidade

Mèigos de famìlia, dae sa riforma unu cambiamentu istòricu. Forsis finas pro sa Sardigna

Unu cambiamentu istòricu pro sa sanidade in Itàlia. Diat pòdere arribbare cun sa riforma sustennida dae su ministru de sa Salude, Orazio Schillaci, e dae sas Regiones. Sa novidade manna pertocat su ruolu de sos mèigos de famìlia chi diant devènnere dipendentes de su Servìtziu Sanitàriu Natzionale. Como traballant comente professionistas lìberos. Nos tocat iscrìere cun su cunditzionale ma si su pranu deveret èssere aprovadu medas cosas diant cambiare a livellu sanitàriu locale, fintzas in Sardigna ue tra sos problemas prus graes, chi afigint mescamente s’internu, b’est pròpiu sa farfa de sos méigos.

Milena Gabanelli at faeddadu de sa riforma in sa rubrica DataRoom de su Corriere della Sera a pustis de àere lèghidu una botza de sa riforma. Sa punna de su progetu est de garantire un’assistèntzia sanitària diramada a livellu locale pro fàghere funtzionare 1.350 Domos de sa Comunidade finantziadas cun 2 milliardos de èuro, dinari chie arribbat dae su Pnrr.

Tres sunt sas novidades prus de importu de sa riforma: sos mèigos de famìlia noos ant a èssere assùmidos in deretura, mentras chie como est in servìtziu at a pòdere seberare si abarrare lìberu professionista o colare a su règimene nou. In prus sos mèigos ant a dèvere traballare siat in sos istùdios pròpios siat in sos ambulatòrios territoriales noos ue at a èssere garantida s’assistèntzia sanitària dae sas 8 de su mangianu a sas 8 de sero.

In prus a sa chida sos mèigos diant dèpere traballare pro 38 oras, partzidas tra assistèntzia direta a sos malàidos e programmatzione territoriale. Custu at a dipèndere dae su nùmeru de malàidos sighidos, cun unu mìnimu de 6 oras de assistèntzia direta finas a unu màssimu de 24 oras pro chie tenet prus de 1.500 assistidos. S’obietivu est garantire sa presèntzia de unu mèigu pro totu sa die, fintzas in sas biddas prus piticas, isfrutende sas Domos de sa Comunidade (Case di Comunità) e sos ambulatòrios pùblicos postos a disponimentu dae sas Regiones.

Sa mancántzia de mèigos de base in Sardigna est unu problema meda intesu. Sos datos difùndidos dae sa Sotziedade italiana de meighina generale (Simg) in un’addòbiu chi s’est tentu in Casteddu in su mese de cabudanni sutalìniant chi serbint 500 dutores, sa parte manna in sas biddas de s’Aristanesu, in Ogiastra, Barbàgia, Sulcis. Como però finas in Casteddu e Tàtari fartant mèigos de famìlia. Intro su 2026 est prevìdidu chi unos 300 mèigos lompant a sa pensione.


Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018

De lèghere

Atualidade

In sa ASL de su Campidanu mesanu unu laboratòriu isperimentale de istimulatzione cognitiva

Tzitades e biddas

S’antigu bardianu de su Supramonte  colossos de Europa pro devènnere s’Àrbore europeu de s’annu A pustis de àere conchistadu su tìtulu de Àrbore Italianu...

Atualidade

In su sequel de su contu de su «providentzialismu mìticu» b'est sa derrota de su pùblicu

Atualidade

Su nùmene de sa Costa Smeralda est ligadu a su de Karim Aga Khan. Su prìntzipe de sos musulmanos “ismailiti nizariti”, devènnidu imàm cando...