Deghe dies de tzìnema in antis a su mare, addòbios cun autores, registas, produtores. Ma fintzas teatru, libros, mùsica. In S’Alighera torrat “Cinema delle terre del mare”, chi at a animare sos logos prus bellos de sa tzitade dae su 22 a su 31 de trìulas.
Su fèstival, organizadu dae sa Sotziedade Umanitària de S’Alighera, at a èssere unu tributu a sa de sete artes e a su raportu cun su mare. Intre sos invitados nche sunt sas registas Nuria Giménez Lorang, dae sa Catalugna, Alessia Butone e Silvia Giulietti, su regista sardu isulanu Mario Piredda, famadu pro sa pellìcula L’agnello, su produtore Alessandro Greco.
Sas dies de su fèstival ant a èssere introduidas dae sa presentada de su progetu seriale “Tufos”, nàschidu dae un’idea de sa diretora de sa Sotziedade Umanitària de S’Alighera Alessandra Sento. Unu momentu de valorizatzione de sa memòria tzinematogràfica audiovisiva (cun imàgines postas a disponimentu dae s’archìviu de sa Cineteca Sarda) chi collit su tzìnema privadu e de famìlia giradu in Sardigna intre sos annos ’40 e ’80. “Sa memòria tocat a dda manigiare cun cura, – ispiegat Alessandra Sento – e andat allogada. Ma depet èssere fintzas ispiratzione pro carchi cosa de nou”.
Su regista Marco Antonio Pani at postu paris istòrias, cunfessiones, cunfiantzas de persones chi in S’Alighera sunt naschidas, ant bìvidu, ant seberadu de abbarrare. Messàgios vocales registrados in soledade, impreende in manera simple su telefoneddu pròpiu: 14 istòrias piticas in cales sas imàgines de eris si ammesturant a sos sentidos de oe. Sos ammentos de infàntzia, sos giogos in abba, sos amores istiales, su sabore de su sale chi fatitzat a lassare sa pedde, s’anneu de sa mancaria, sa netzessidade de torrare.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
