Torra Tittìa, torra s’Oca. Su fantinu sardu-tedescu Giovanni Atzeni cunfirmat chi como su re de sa pratza est isse. Eris at bìnchidu sa ‘carriera’ de trìulas de su Pàliu de Siena, cursa su de tres imbètzes de su duos pro more de su tempus malu, in paris cun sa contrada de s’Oca. Gosi est arribbadu a otènnere su de ùndighi pàlios bìnchidos.
Cun custa vitòria su fantinu de Nurri acùrtziat sa distàntzia sua dae Andrea Degortes naradu “Aceto” chi in s’istòria reghente de su Pàliu de Siena est su fantinu chi at bintu prus carrieras (14) sighidu dae Luigi Bruschelli “Trecciolino” (13) e dae Tittìa (11) chi però est s’unicu galu in atividade. A palas b’at un’àteru sardu, Salvatore Ladu ‘Cianchino‘ (8).
Tittia at bìnchidu subra de Diodoro su caddu chi sa sorte at batidu in sa contrada de s’Oca. Su matessi Giovanni Atzeni at pesadu e allenadu s’animale in s’iscuderia sua. Duncas Tittìa no at tentu dificultade peruna cun su caddu finas chi curriat pro sa prima borta in sa pratza de Siena pro su Pàliu. Como acontessit a s’ispissu at bìnchidu no isceti a caddu ma gràtzias a s’istrategia sua, cuncordada bene prima e in s’interis de su pàliu: un’istrategia fata de alleàntzias e rivalidades. E, comente prevident is règulas de su Pàliu, forsis finas de dinari.
In s’editzione ùrtima de sa cursa tra deghe caddos chi ant cùrridu, noe sunt nàschidos e pesados in s’ìsula nostra. De prus, tra is deghe fantinos is sardos fiant oto e pro sa prima borta intre is deghe duos fiant de Ulìana, Andrea Sanna ‘Virgola‘ (Selva) e Antonio Mula ‘Shardana‘ (Lupa).
Cando at cumentzadu sa cursa, a pustis de una ‘mossa’ de trinta minutos, Tittìa s’est postu in deretura primu sighidu dae Virgola e Shardana chi però at faladu a terra a sa prima curva de San Martinu. Virgola at sighidu Tittìa finas a su de tres giros cando finas isse nd’est arrùidu a terra. Bene sa cursa de ‘Gingillo‘ Giuseppe Zedde chie fiat de ‘rincorsa’. Esordiu pro Michel Putzu ‘Spago‘ de Teti cun sa contrada de su Drago chi però est intradu a pustis de is àteros a su cumentzu de sa cursa, duncas no est andada meda bene. Is àteros sardos fiant Giosuè Carboni ‘Carburo‘ (Chiocciola), Francesco Caria ‘Tremendo‘ (Pantera), Carlo Sanna ‘Brigante‘ (Tartuca).
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
