Ses milliones de èuros pro s’iscuadra de sa Giunta. Regortas giai 3.800 firmas contra sa riforma

In sa foto: su presidente de sa Regione Christian Solinas

Protesta de su pòpulu de sa retza contra su disinnu de lege de sa giunta regionale sarda pro sa riorganizatzione de sa presidèntzia e de is assessorados. Totu est cumentzadu dae sa petitzione in sa prataforma de campagnas sotziales Change.org, promòvida dae sa ex consigiera de sa Munitzipalidade de Pirri Rossella Pes. In una pariga de dies sunt istadas regortas prus de 3.800 firmas.

“Su sèberu de destinare 6 milliones de èuros pro afortigare s’iscuadra de su guvernadore de sa Regione – at iscritu Pes in su testu de sa campagna sua – arribbat pròpiu immoe chi sa regione nostra depet detzìdere comente impreare is fundos pro gestire custa fase delicada contra sa pandemia”.  In pagu tempus chentinas e chentinas de internàutas sardos ant rispostu a sa cramada publicada in su situ de petitziones in lìnia. “Sa Sardigna est bivende unu momentu lègiu a beru – si leghet in su testu de sa campagna – cun medas famìlias chi sunt abarradas sena rèdditu, cun mìgia de istudiantes chi ant dificultade a atzèdere a sa didàtica a distàntzia pro sa mancàntzia de trastos eletrònicos o pro more de connessiones chi funtzionant male a càusa de una retza sena infrastruturas modernas, cun una surra de tzitadinos espostos a sa cundidura chi arriscant de afrontare sa maladia in unu sistema sanitàriu disorganizadu, chi est poderende petzi gràtzias a su sacrifìtziu de su personale sanitàriu”.

Pro totu custos motivos, in medas ant aderidu a sa campagna firmende sa petitzione contra sa proposta de su presidente Christian Solinas pro suportare s’atzione de su guvernu suo. Pro is firmatàrios ses milliones sunt tropu a beru: “Dae chie nos guvernat bolimus unu pranu istraordinàriu chi rispondat a is apretos sotziales, econòmicos de is tzitadinos – sighit sa petitzione – chi torret a pensare s’organizatzione e sa gestione de una sanidade pùblica eficatze e investimentos pro agiudare s’economia”.

Inoghe sa petitzione

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*