Su Rennu Unidu, in foras de s’Unione europea, fùrriat a manca. Sos laburistas ant bìnchidu sas eletziones polìticas otenende unu nùmeru de votos bastantes a guvernare solos. Fiat dae su 2010 chi sos cunservadores nche fiant a caddu cun David Cameron a primu e Theresa May, Boris Johnson, Liz Truss e Rishi Sunak a pustis. Sunak, galu a votos contende·los, at deretu telefonadu in modalidade “parabenes” a s’aversàriu suo cando chi custu nch’aiat giai coladu sos 326 sègios. De cada manera sos cunservadores non nche falant a sa de tres positziones comente in medas aiant prevìdidu.
Su votu in Uk est un’indicadore da mùtria de sos eletores a pustis de belle 15 annos de polìticas liberales e de assàchios a su welfare. Su sèberu eletorale, finas in Iscòtzia a dannu de su Snp, custu nos narat: chi b’at gana de cambiamentu. Ma sos labristas de Starmer a nd’ant a dare de rispostas? Esponente de sa soft-left e ecuilibrista in contu de Brexit, a un’ala si mustrat comente un’anti-Corbyn (mancari fiat ministru-umbra suo), a s’àtera non s’atrivit a promìtere solutziones.
In Frantza imbetzes domìniga votant pro su segundu turnu de sas legislativas. In custu paisu sa manca de su Nouveau front populaire at conchistadu sa segunda positzione brinchende·nche sos de Macron. Deretu Jean-Luc Mélenchon de sa France insoumise (e gasi àteros cabos de sos partidos coalizados) at annuntziadu su ritiru de sos candidados de manca in ue segundos fiant sos macronistas, pro chi in cussu collègiu non bincat sa dereta de Le Pen e Bardella. Ma s’agiudu torradu non b’est in totue e, de prus, b’at una cunvergèntzia a un’ala e a s’àtera pro nch’aorare pròpiu a Mélenchon (chi giai pro parte sua at fraigadu sas listas aorende·nche sos candidados prus de manca). S’iscenàriu est fàtzile a l’intzertare.
Serramus cun una nova italiana-europea. Aìamus contadu de su sèberu a posteriori de sos de Conte in Europa: «su M5S – artìculu nostru de su 21 de abrile – non at galu disinnadu a cale grupu at a aderire, a su chi narat Conte, su matessi Conte chi acusat a sos segretàrios de partidu chi sunt candidados ma chi non b’ant a andare a Bruxelles». Bene. Est nova de pagas oras chi sos eletos pentisteddados si nch’ant a sètzere in su grupu de sa manca, the Left. Pròpiu issos, sos chi in Europa fiant cun Farage (chi, torrende a Uk, custu giru bi l’at fata) e chi in Itàlia fiant cun Salvini.
Sa risposta a sa dimanda “Ite li mancat a sa manca?” forsis est “pròpiu nudda”.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
