In Sardigna, mescamente in su Nugoresu, si chircant domos pro acollire sas famìlias de refugiados afghanos – in totu 20 persones fuidas dae su paisu issoro, como suta de sos talebanos – arribados in Sardigna e destinados a sos vàrios tzentros de sa provìntzia. Sos Comunos difatis non disponent de domos bastante mannas pro acasagiare famìlias cun fìgios.
Interessados sos amministradores de sos 20 Comunos de su distretu Plus, chi ant fatu un’apellu a sos tzitadinos chi tenent domos lìberas. A lestru ant a bènnere publicados sos mollos pro sa manifestatzione de interessu. A càrrigu de su propietàriu no b’at a èssere peruna ispesa: s’agiudu a sos refugiados difatis est pagadu cun interventos pùblicos, gràtzias a su progetu Sai (Sistema de acasàgiu e integratzione).
“Faghimus apellu a sa sensibilidade de sos tzitadinos nostros pro chi pòngiant a disponimentu domos serradas pro agiudare persones chi sunt istadas custrintas a si fuire dae s’atuale regìmene afghanu – ispiegant sos sìndigos in una nota de imprenta – Totus tenimus in sos ogros sas imàgines terrorosas de s’aeroportu de Kabul, cun sas mamas chi intregant sos fìgios minores issoro in sas manos de persones disconnotas cun s’ispera de los fàghere essire dae unu Paisu chi non reconnoschet sos deretos tziviles fundamentales e non podet prus dare seguridade e unu benidore de paghe. Sa cosa pretzisa est cussa de agatare unu logu acanta istare a sas famìlias – ispiegant sos amministradores locales – cunditzione netzessària pro cumentzare unu percursu de integratzione bera in su territòriu nostru”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
