Chimbanta filmmaker dae totu su mundu in Sardigna pro contare sa vida de Seui. In sa bidda de sa Barbàgia de Seùlu dae lùnis nche sunt giòvanos registas chi pro una chida ant a filmare istradas, padentes, istòrias, monumentos e persones chi ant a divènnere parte de unos cantos de curtzumetràgios.
S’initziativa arribbat gràtzias a Cinemadamare, unu format chi tenet sa punna de promòvere is territòrios a traessu de su tzìnema, cun su contributu de su Comunu de Seui chi at accòllidu custa ocasiòne non petzi pro is giòvanos tzineastas, ma fintzas pro s’intrea comunidade de sa bidda.
Su progetu bolet creare unu ligàmene tra sa traditzione locale e sa creatividade de giòvanos chi benint dae totu su mundu. Sa gente de Seui ant rispostu pronta a si pònnere in giogu. Sabadu 7 de cabudanni, in pratza de is Milìtzias, s’at a tènnere sa projetzione pùblica de is curtzumetràgios realizados durante sa chida, oferende a totus s’oportunidade de bìdere sa bidda pròpia contada a traessu de ogros noos e creativos.
Cinemadamare est unu progetu internatzionale chi pertocat cada annu chèntinas de giòvanos tzineastas, gràtzias a sa collaboratzione cun prus de 55 Universidades e iscolas de tzinematografia de totu su mundu. Su campus, chi s’acumprit in diversas regiones italianas in s’istade, faghet tapa in Seui giughende cun sese unu “set” creativa in caminu. Cada chida, in una localidade diferente, is partetzipantes tenent s’oportunidade de realizare curtzumetràgios, leare parte a workshop e letziones de tzìnema, e de si cunfrontare cun àteras realidades culturales. Seui est una tapa privilegiada de custu percursu, oferende a is giòvanos tzineastas un’ambiente ricu de ispiratziones.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
