Sos latinos naraiant chi «de mortuis nil nisi bonum». E cunforma a su chi como semus leghende in riferimentu a s’Aga Khan, a pustis de sa dispedida sua, non de malu ma fintzas de crìticu bi nd’at pagu. Su mundu polìticu est unànime giughende s’esperièntzia de sa Costa Smeralda e sa RaS at decretadu s’istitutzione de su corrutu regionale.
Sa Regione est in corrutu ca su prìntzipe Karim at pesadu «in unu cuntestu territoriale ispantosu ma malu a lu valorizare, unu modellu de isvilupu virtudosu pro unu territòriu e pro un’ìsula intrea».
Sas paràulas crae de s’allega de sa presidente Todde sunt “destinatzione turìstica” («cando custu cuntzetu deviat galu essire a campu»), “insediamentu urbanu rispetosu de s’ambiente” («chirchende collaboradores comente s’architetu Simon Mossa») e “investimentos personales” («sena pedire dinare pùblicu»).
Est craru chi est un’allega econòmica dae ue s’Aga Khan nd’essit binchidore mescamente si paragonadu a «àteros setores» chi cun s’ambiente b’ant fatu a pùngios e chi ant pigadu muntones di finantziamentos.
Est su sequel de su contu de su «providentzialismu mìticu», pighende sas paràulas de Bachis Bandinu, chi però mustrat non sa derrota de àteras imprenditorialidades ma de sa Regione matessi. De una Regione chi non faghet issa su chi devet fàghere.
Todde faeddat de «infrastruturas istratègicas comente un’aeroportu, unu portu e fintzas una cumpangia aèrea». Pagu prus o mancu su chi at naradu s’assessore suo Franco Cuccureddu: «At individuadu su target (lussu), sos servìtzios e sas infrastruturas indispensàbiles pro fàghere turismu». A banda de su portu pro sos maxiyacht, de sos albergos e de sas villas, fintzas Cuccureddu mentovat «aeroportos, istradas e cumpangia aèrea».
Non sunt cosas, custas, chi diat dèvere fàghere su pùblicu? E non sunt cosas chi su pùblicu diat dèvere fàghere turismu o mancu? Semper Cuccureddu narat, a concruos, chi «nos at a mancare un’imprendidore sèriu, capatze, cun sa mirada longa e rispetosu de s’ambiente».
Ma tando, si non bi nd’at, no est mègius chi siat su pùblicu a gestire su turismu e cale si siat àtera indùstria chi interesset s’ambiente?
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
