Su nùmene de sa Costa Smeralda est ligadu a su de Karim Aga Khan. Su prìntzipe de sos musulmanos “ismailiti nizariti”, devènnidu imàm cando ancora teniat pagu prus de binti annos, est cunsideradu su fundadore de su turismu in Sardigna partinde dae sos annos Sessanta.
S’istòria de s’Aga Khan in Sardigna cumintzat a s’agabbu de sos annos Chimbanta cando in Sardigna arribat John Duncan Miller finantzieri inglesu chi abarrat ispantadu dae su territòriu de Monti di Mola in Gaddura.
Miller a sos cumpàngios suos de sos tzìrculos finantziàrios de Londra faeddat de sa bellesa chi aiat agatadu in Gaddura caturende s’atentzione de su Prìntzipe Karim Aga Khan. Karim bisitat sa zona e, paris cun àteros investidores, faghet nàschere sa chi oe est una de sas metas turìsticas internatzionales de pro sos ricos.
In pagu tempus, cumintzat a comporare sos terrinos chi aparteniant pro sa parte prus manna a sas famìlias Azara e Orecchioni. In su 1962 benit fundadu su Cunsòrtziu Costa Smeralda cun s’obietivu de compidare s’isvilupu urbanìsticu, territoriale e architetònicu pro evitare un’ispeculatzione edilìtzia. Tra sos sòtzios fundadores, in prus de s’Aga Khan, b’at Patrick Guinness, Felix Bìgio, John Duncan Miller, Andrè Ardoin e René Podbielski. Benit istituidu unu Comitadu de Architetura, cumpostu dae Luigi Vietti, Jacques Couëlle, Michele Busiri Vici e Antonio Simon Mòvida, pro garantire un’istile architetònicu in lìnia cun sa natura e sa traditzione de su logu.
A pustis de sa nàschida de su Cunsòrtziu, benint fraigados sos primos caminos e costruidos sos impiantos pro s’abba e s’eletritzidade. Tra sos primos edifìtzios b’est s’hotel Cala de Volpe, progetadu dae Jacques Couëlle, e su burgu de Poltu Celvu (Porto Cervo), progetadu dae Luigi Vietti e inauguradu in su 1964. In su 1968 inchingiat sa crèsia de Stella Maris, òpera de Michele Busiri Vici. Gràtzias a sa promotzione de s’Aga Khan e de su Cunsòrtziu in sos ambientes prus ricos de su mundu, sa Costa Smeralda fiat divenit su logu de su “jet set” internatzionale.
S’isvilupu de sa Costa Smeralda donat benefìtiziu finas a s’economia de sa Gaddura. In su 1963 benit fundada sa cumpangia aèrea Alisarda, posca devènnida Meridiana e Air Italy. S’aeroportu de Terranoa torrat a abèrrere in su 1964 e posca benit sostituidu dae s’iscalu atuale chi giughet su nùmene de sa Costa Smeralda.
Oe sa propriedade de sa Smeralda Holding, sotzietade chi tenit sos hotel prus de importu e manìgiat sos servìtzios de sa Costa Smeralda, est de sa Qatar Holding chi dd’aiat comporada dae Tom Barrack sutzèdidu a Aga Khan in su 1994.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
