“Dae sa chida chi benit incumentzemus a fàghere controllos pro su Covid-19 a totus is chi intrant in Sardigna”. Dd’at annuntziadu su presidente de sa Regione Christian Solinas a “Un giorno da pecora” in Rai Radio Uno. “A chie isbarcat — custos is faeddos de Solinas — pedimus carchi minutu ebbia pro si sutapònnere a una proa lestra: si su resurtadu est positivu iscatant is protocollos prevìdidos”.
Su guvernadore, in prus, at decraradu chi in s’istade si previdet de fàghere imbucare in Sardigna solu chie s’est vatzinadu contra su Covid o chie s’at a presentare cun unu tzertificadu de negatividade. “Pròpiu pro garantire un’istajone in seguridade, semus insistende – at craridu – pro tènnere sa possibilidade de investire in una campagna manna de vatzinatzione. Est pro custu chi amus ativadu prus de chimbanta postòrgios acanta immunizare totu sa populatzione”.
In su mentres is iscolas superiores sardas sunt prontas a torrare a abèrrere lunis, s’8 de martzu, a su 100% in presèntzia. Ma sa Regione racumandat prus prudèntzia, pro non pèrdere sa conchista de sa zona bianca. “Immoe — at ispiegadu su diretore iscolàsticu regionale Francesco Feliziani — no nche ant a èssere prus is limitatziones pro is letziones in presèntzia”.
Sa solutzione podet èssere cussa de pedire in deretura is vatzinos in is iscolas. Dd’at propostu pro primu s’assòtziu natzionale Presidi Sardegna: “Su personale iscolàsticu — at iscritu sa presidente de s’Anp Anna Maria Maullu in una lìtera a Solinas e a s’assessore regionale de sa Sanidade Mario Nieddu – est sena duda una de is categorias a arriscu de cundidura, duncas est pretzisu a garantire totu is mesuras de amparu netzessàrias. Pro is iscolas de sa Sardigna est arribbadu su momentu de aviare unu pranu de vatzionatziones, garantende in custa manera sa seguridade e sa serenidade de is pitzocheddos nostros”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
