Sa Sardigna in su 2024 sighit sa crèschida econòmica cumintzada in su 2018 e firmada isceti in su 2020 dae sa pandemia de su Covid. Creschent Pil e consumos, creschet s’ocupatzione e calat sa disocupatzione (su livellu est su prus bassu de sos ùrtimos 50 annos). Custos resurtados sunt influentzados dae s’andamentu favorèvole de unos cantos setores crae pro s’economia sarda: su turismu ma fintzas s’edilìtzia e s’agricultura.
Est custa s’anàlisi de su Crenos su tzentru de chircas econòmicas de sas Universidades de Casteddu e Tàtari chi fintzas ocannu at fotografadu s’istadu de s’economia in Sardigna.
“Custu iscenàriu positivu diat fàghere pensare cun otimismu a su benidore – si leghet in premissa de su documentu – frenadu però dae dificultades de importu. Sa prima pertocat sa demografia. Sa segunda naschet imbetzes dae sa congiuntura econòmica e polìtica. In cale diretzione si diant dèvere orientare isfortzos e risursas? De seguru conca a sa sanidade. Sas dificultades istruturales de su sistema sanitàriu cumpromitent difatis s’ecuidade in s’atzessu a sas curas intre chie si podet permìtere solutziones privadas e chie sa possibilidade non dda tenet”.
S’anàlisi demogràfica cunfirmat sos problemas nòdidos de sa Sardigna: in su 2024 sunt nàschidas 7.037 persones e su tassu de natalidade contat de 4,5 nàschidos cada milli abitantes. Est su valore prus bassu in Itàlia acanta si registrant 6,3 nàschidos cada milli abitantes.
Su saldu intre chie movet a Sardigna e chie la lassat abarrat positivu in su 2024 ma est calende: sa mobilidade regionale no arrenneschet de controire sa mèngua de sa populatzione. In su 2024 sighit su protzessu de imbetzamentu e s’edade mèdia de sos residentes est de 49,2 annos.
Sos traballadores intre sos 15 e 64 annos creschent de su 0,6% mescamente pro more de sa crèschida de sa presèntzia de sas fèminas chi traballant. Su nùmeru de ocupados creschet de prus de 14mìgia pessones, batinde su tassu de ocupatzione a su 57,7% (62,2% in Itàlia). Sa disocupatzione calat de su 16,6% giughende sa pertzentuale cumplessiva a su 8,3% (6,5% in Itàlia).
Creschet s’ocupatzione in su setore de su cummèrtziu, de sos albergos e ristorantes. Su valore de s’indùstria imbetzes abarrat prus pagu de sa metade de su valore natzionale, mentras su de sa agricultura crompet a su 6% contra su 3,4% de s’Itàlia. Su setore de sos fàbbricos recuperat su calu de s’ocupatzione registradu in su 2023 cun una crèschida de su 17,5%.
Sos datos turìsticos de su Servìtziu de s’Istatìstica Regionale pro su 2024 registrant sa crèschida siat de sos arribos (+11%) siat de sas presèntzias (+10%) respetu a su 2023. Mescamente istràngios (+17%) respetu a sos italianos (+3%).
Intre sas notas negativas, Sardigna in su 2022 at registradu unu peoramentu generalizadu de sos tempos de isetu pro sos ricòveros programados in règimene ordinàriu e in day hospital, cun ritardos graes pro interventos oncològicos (tumore a sa mammella e colon-retu), cardiovascolares (bypass coronarico) e pro sa chemioterapia.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
