Su calendàriu de sas garas de fùbbalu pro sa Sèrie A 2026/27 est ufitziale: s’istajone noa de su Cagliari comintzat su 23 de austu in su campu de su Parma. Un’inghitzu chi si presentat deretu intensu pro sos rujubiaitos, cun fatu fatu unu turnu dòpiu in s’Unipol Domus contra a s’Inter (su 30) e su Lecce (su fine de chida a pustis).
Unas cantas novidades mannas essint a pìgiu pro custu su torneu comente su pasu natalìtziu introduidu a nou e sa firmada longa atongina pro more de s’acorpamentu cun sas ventanas Fifa. Unu comintzu in pigada, comente sutaliniadu dae s’Ad Stefano Melis: «Giogare contra a Inter, Juventus e Atalanta in sas primas ses dies at a èssere unu bancu de proa importante. Ant a contare continuidade, traballu e capatzidade de si fàghere agatare prontos pro chi sa gente nostra nde tèngiat orgòlliu mannu».
Ma su benidore de su Cagliari si giogat fintzas in foras de su campu. In su Fèstival de sa Sèrie A de Parma, su presidente Tommaso Giulini at torradu a inchèndere sos rifletores subra su progetu de s’istàdiu nou, contende un’iter burocràticu percossosu comintzadu prus de deghe annos a como.
«Semus a curtzu a s’aprovatzione de su pianu econòmicu finantziàriu, ma in Itàlia a fraigare un’impiantu est prus chi non complicadu, un’odissea a beru intre vìnculos e entes», at ispiegadu su patron, evidentziende sas dificultades in sas cunfirmas de acòrdios privados e in sos diritos de denominatzione in mercados evolvende·si de continu.
Sa proposta de Giulini mirat a s’Europa: «Su modellu de sighire – at annantu – est su de sa Frantza pro sos Europeos de su 2016. Inie s’Istadu at finantziadu cun prus de 800 milliones sa restruturatzione e sa nàschida de impiantos noos tràmite sos entes locales. Si non b’aeret un’imprendidore italianu ghiende su Club, oe sa tzitade non diat tènnere possibilidade peruna».
Intre sos disafios de su retàngulu birde e s’ambitzione de pònnere in fines sa prima pedra de s’impiantu nou, pro su pòpulu rujubiaitu comintzat un’annada detzisiva.
