Est istadu su giornalista Wolf Blitzer de sa Cnn, a ora de is 11.24, ora locale, su primu a donare sa noa: “Pustis 4 dies de cuntierras semus lòmpidos a unu momentu istòricu de custa eletzione, immoe podimus nàrrere chie est su binchidore de is eletziones”. Fatu fatu a sa Cnn sa noa est istada ufitzializada dae is àteras televisiones prus importantes. Tando: Biden est su presidente nou de is Istados Unidos.
“Sa democratzia americana est subravìvida a Trump”, at iscritu su diretore David Remnick in su New Yorker. Segundu is ùrtimos datos, Biden at otentu 75 milliones de votos a livellu natzionale (Tramp s’est firmadu a prus a mancu 71 milliones) e est su candidadu presidente prus votadu de s’istòria de is presidentziales de is USA. At a intrare in s’istòria fintzas Kamala Harris, sa vitze-presidente, sa prima fèmina niedda e sa prima de orìgine asiàtica chi at a tènnere cussu ruolu.
S’iscrutìniu sighit in medas Istados, ma a pustis de medas polèmicas sa Pennsylvania e su Nevada sunt istados assignados a su candidadu democràticu Joe Biden, chi cun is 26 Mannos Eletores de custos duos istados arribat a 279, noe in prus de su chi serbit pro èssere elègidu presidente.
Trump s’est firmadu a 214 Mannos eletores. S’isetant is resurtados definitivos de Arizona, Georgia e North Carolina, ma si podet giai nàrrere chi su tycoon est su de bator presidentes de s’istòria de is Istados Unidos a no èssere istadu torradu a elègere pro su segundu mandadu. S’ùrtimu est istadu George H. W. Bush, in 1992.
