Est arribbadu in su merie in s’aeroportu de Ciampino in Roma s’aèreu mòvidu custu mangianu dae Teheràn pro batire in Itàlia sa giornalista Cecilia Sala, detenta in presona in Iràn dae su 19 de nadale 2024.
A Cecilia Sala dd’at acollida dae sa premier Giorgia Meloni. A la retzire b’aiat fintzas su ministru de sos Èsteros Antonio Tajani, su sìndigu de Roma Roberto Gualtieri, sa mama Elisabetta Vernoni, su babbu Renato Sala, s’amoradu Daniele Raineri giornalista.
“Gràtzias a unu traballu mannu fatu dae si diplomàticos e dae s’intelligence, sa cunnatzionale nostra est istada liberada dae s’autoridade iraniana. Su Presidente de su Cussìgiu, Giorgia Meloni, torrat gràtzias a totus cussos chi ant contribuidu a rèndere possìbile sa torrada de Cecilia. Su Presidente at informadu sa mama e su babbu de sa giornalista cun una telefonada”. Gasi, in una nota, Palazzo Chigi at annuntziadu custu mangianu sa liberatzione de sa giornalista de Il Foglio e Chora Media.
Sala, giornalista e podcaster de 29 annos fiat andada a Iràn cun unu vistu giornalìsticu: fiat arribbada su 12 de nadale, diat èssere dèvida torrare su 20. S’Iran no l’at mai incurpada in manera ufitziale de calicunu reatu: ant naradu sende chi fiat istada arrestada pro “àere violadu sas leges de sa Repùblica islàmica”.
Cun sa liberatzione de Cecilia Sala, faghet ischire s’Ansa, diat pòdere èssere possìbile fintzas sa liberatzione de Abedini, firmadu in Malpensa a pustis de sa rechesta de is Istados Unidos, e como detentu in su càrtzere de Opera. S’ingenieri de 38 annos, chi at pedidu is arrestos domitziliares, diat pòdere èssere liberadu isceti cun una rechesta de su ministru de sa Giustìtzia Carlo Nordio.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
