S’antigu bardianu de su Supramonte colossos de Europa pro devènnere s’Àrbore europeu de s’annu
A pustis de àere conchistadu su tìtulu de Àrbore Italianu de s’annu 2024, su longhifresu de Matari, situadu dae sos bacos isfundos de su sartu de Orthullè, in Ogiastra, est prontu a rapresentare s’Itàlia in sa cumpetitzione European Tree of the Year 2025. Cun prus o mancu 500 annos, una tzircunferèntzia de 5 metros e un’artària chi nche giumpat sos 17 metros, custu gigante birde como at a disafiare àteras 15 matas monumentales europeas in gara pro su tìtulu de àrbore prus significativu de s’annu.
S’Eni ’e Matari, postu in mesu a unu padente de èlighes de su Supramonte de Orthullè, a probe de unu bidditzolu nuraghesu, intre su riu Flumineddu e Gorropu, est in cumpetitzione contra unos cantos intre sos esemplares prus imponentes de su continente, comente su Mēru Grand Oak de sa Letònia, su chercu seculare polacu “Heart of the Dalkowskie Hills”, su Ginkgo Biloba de sos Paisos Bàscios e su Lukavice Oak de sa Tzèchia.
Sas votatziones in lìnia, gestidas dae sa Giant Trees Foundation, sunt abertas dae su 3 a su 24 de freàrgiu 2025. Pro votare S’Eni de Matari, bastat a si collegare a su situ ufitziale de sa cumpetitzione, seletzionare duos àrbores in gara, cunfirmare su sèberu pro mèdiu de s’acàpiu imbiadu cun curreu eletrònicu e cumpletare su votu.
Dae su 2011, s’European Tree of the Year tzèlebrat su valore de sos àrbores monumentales, promovende s’amparu issoro e sensibilizende s’opinione pùblica in contu de biodiversidade. Sa presèntzia de s’Eni de Matari intre sos candidados a su tìtulu no est unu reconnoschimentu a sa maestosidade sua ebbia, ma fintzas un’ocasione pro pònnere a notu s’importu de sa cunservatzione de su patrimòniu arbòreu italianu e sardu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
