Pro sa prima bia in s’istòria, sa Sardigna acasàgiat una de sas prus mannas esercitatziones internatzionales de Protetzione Tzivile de s’Unione Europea. Si tratat de “Ita Eu Modex 2025”, un’operatzione de 40 oras totu dedicadas a sa luta contra sos fogos boschivos. Finas a s’11 de abrile, sete mòdulos internatzionales s’ant a dare sa muda in sos montes e in sos padentes de sos sartos de Nùgoro, Mamujada e Orane pro simulare iscenàrios de apretu e testare sas capatzidades de interventu e coordinamentu intre sos diversos Paisos europeos.
Su tzentru operativu de s’esercitatzione est in sa sede de su Servìtziu Territoriale de s’Agèntzia Forestas de Su Pinu, acanta at a nàschere fintzas s’Iscola de Formatzione de su Corpus Forestale e de Vigilàntzia Ambientale.
S’addestramentu est promòvidu in intro de su Mecanismu Unionale de Protetzione Tzivile, su trastu de coordinamentu de s’UE in ocasione de apretos naturales o causadas dae s’òmine. Nàschidu in su 2001, su Mecanismu ponet in rete sas risursas e sas cumpetèntzias de 37 Paisos (sos 27 membros UE prus 10 extraeuropeos), prontos a s’agiuare a pare in casu de apretu. In Sardigna, s’initziativa interessat prus de 350 operadores partzidos in sete mòdulos, ses de terra (bènnidas de Àustria, Bulgaria, Grètzia, Romania, Islovàchia e Islovènia) e un’aèreu, fintzas custu gregu. Cada iscuadra est autosufitziente, comente in unu beru cuntestu emergèntziale.
Is iscuadras ant a traballare in sete iscenàrios operativos, mescamente logos de padente prus a arriscu pro su fogu . Sa proa previdet fintzas simulatziones cun su fogu de “interfaghe”, est a nàrrere cando su fogu minetzat fintzas sas domos cun sa gente. Totu sas operatziones sighint unu protocollu severu pro garantire sa seguridade de su personale e de sa populatzione.
“Custa esercitatzione – si leghet in su giassu de Forestas – no est unu bancu de proa tècnicu ebbia, ma fintzas un’ocasione de importu pro afortiare sa collaboratzione intre sistemas de amparu tzivile diversos e averiguare sa cumpatibilidade de sos mòdulos internatzionales.”
Sa mente torrat a su fogu de su Montiferru in su 2021, cando sa Regione aiat dèvidu ativare su Mecanismu unionale pro retzire s’agiudu aèreu de Grètzia e Frantza. Un’ocasione in ue fiat essida a campu s’importàtnzia de sa solidariedade intre Istados pro parare fronte a sos apretos e a sas disauras naturales.
Fintzas a como in Itàlia custa genia de esertzitatziones las aiant isperimentadas petzi sas istruturas istatales. Pro custu, s’afidamentu a sa Sardigna de unu ruolu de protagonista est unu reconnoschimentu non de pagu contu pro su sistema regionale e pro su traballu de sas istruturas operativas locales, interessadas dae meses in s’abrontu de custa esertzitatzione.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
