Sa campagna de iscavos noa in su giassu de sa necròpoli nuràgica de Mont’e Prama at bogadu a pìgiu su bustu e àteros bucones de duas istàtuas noas. Ambas duas identificadas comente “pugiladores de su tipu Cavalupo” pro more de s’iscudu mujaditu imboligadu dae in antis sa carena, belle uguale a sas duas isculturas coberadas a pagu tretu de in cue in su 2014 e immoe espostas in su Museu tzìvicu de Crabas.
“Un’iscoberta ispantosa – at decraradu su Ministru de sa Cultura, Dario Franceschini – chi at a èssere sighida dae àteras, a dimustratzione de su grandu interessu de su Ministeru pro custu giassu istraordinàriu, chi non tenet paragone in su Mediterràneu. S’acatamentu de àteros duos Gigantes, difatis, est acontèssidu a pagu mancu de un’annu dae sa nàschida de sa Fundatzione chi bidet su Ministeru, su Comunu de Crabas e sa Regione Sardigna impinnados in sa valorizatzione de una de sas testimonias prus mannas de una tziviltade mediterrànea antiga”.
“Mentras sos cantos mannos e piticos podent èssere in deretura regortos e documentados – at decraradu sa Subrintendente, Monica Stochino – sos duos blocos sunt mannos e graes e duncas at a èssere prus traballosu a los libertare de dae sa terra e a los recùperare in seguridade”.
S’iscavu, finantziadu dae sa Subrintendèntzi cun 85.000 èuros, at a durare totu beranu, mentras est giai prontu su progetu pro s’interventu imbeniente de 600.000 èuros. In prus est acanta de cumentzare un’interventu galu prus ambitziosu de 2,8 milliones de èuros, chi previdit su restàuru de sas isculturas agatadas dae su 2014 a su 2016. A custas risursas, paris cun sos 3 milliones de èuros destinados a s’ampriamentu de su Museu Archeològicu de Crabas in s’àmbitu de su programma de interventos prevìdidos dae su Pianu istratègicu “Grandi Progetti Beni culturali” annualidades 2015/2016, si sumant 4,15 milliones de èuros pro su situ de Tharros, semper in su comunu de Crabas.
S’iscavu de immoe est su resurtadu de unu traballu mannu de preparatzione iscientìfica e tècnica conduidu dae sos archeòlogos Alessandro Usai e Maura Varigiu, dae s’antropòloga Francesca Candilio, dae sa restauradora Georgia Toreno e dae s’architetu Elena Romoli.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
Cummenta