Su mègius de sa mùsica indipendente tra sos montes de sa Barbàgia. Dae su 26 a su 28 de trìulas in Seui torrat sa de noe editziones de su fèstival SeuInMusica: in su tzentru istòricu de sa bidda tres dies de cuntzertos ma fintzas masterclass, dibatas, mustras e projetziones.
Seui annoat su ligàmene suo cun sa mùsica. In s’agabbu de trìulas, dae chenàbura 26 a domìniga 28, sa bidda acasàgiat sa de noe editziones de su fèstival indipendente SeuInMusica chi at a batire subra de su palcu de pratza de San Giovanni grupos de su panorama musicale underground sardu e italianu.
Sàbadu b’at a èssere su grupu jazz-funk Studio Murena pro s’ùnica tapa sarda de su 2024. Su grupu, nàschidu in Milanu in su 2018, s’est giai ammustradu subra de sos palcos de JazzMi, MusicalZoo, Jazz On The Road e de su Sziget Fèstival de Budapèst. In prus at abertu sos cuntzertos de sos Skunk Anansie e Red Hot Chili Peppers.
Su fèstival at a cumentzare chenàbura 26 cun tres grupos sardos, in òrdine Ethno Trip, The Owl in Daylight, La città di notte. No at a mancare sa prus manna marching band de sa Sardigna, sa SeuInStreet Banda nàschida in Seui etotu. Ant a leare parte a su fèstival sos grupos Sprigu, Notrasa, Choro de Ilha, Andrea Ruggeri Arse e sa cantautora e chitarrista Irene Loche.
Su fèstival organizadu dae s’assòtziu culturale Kromatica cun sa diretzione artìstica de Luigi Murgia e Andrea Sanna, tenit finas àteros addòbios culturales: tres dies de letziones cun una masterclass de improvisatzione musicale a incuru de Simone Grande a sa cale cale si siat si podet iscrìere, ma fintzas un’addòbiu tzinematogràficu e una mustra fotogràfica organizados in paris cun s’assòtziu culturale Arvéschida e su fèstival BiFoto de Mòguru.
In su primu casu in sa Fàbrica de Kimbe at a èssere projetadu su film “Mira sa Dì” a sa presèntzia de su regista Andrea Cannas, in su matessi ispàtziu at a èssere presentada sa mustra “Pinuccio, il viaggio della pietra” de su fotografu Vittorio Cannass dedicada a s’iscultore de Santu Sperau Pinuccio Sciola. Tretu fintzas a sas paràulas cun sa dibata “Fare musica lontano dalle città, lo stato delle cose” cun Gabriele Mureddu e Claudio Loi de sa rivista Sa Scena.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
