Una novidade in s’orizonte de is eletziones regionales de su 2024, unu partidu polìticu formadu dae giòvanos de 40 annos o prus bàsciu. In Sant’Anna, Aristanis, a pustis de s’apellu firmadu dae belle 80 pesonas bènnidas de totu s’ìsula e publicadu in su giassu www.sardegnachiamasardegna.eu si sunt presentadas unas 300 persones.
“Semus traballadoras e traballadores autònomos o dipendentes, in chircat de ocupatzione, istudiantes e istudiantes – si leghet in unu comunicadu de sos promotores – . Bivimus vidas precàrias e ònnia die ponimus aficu meda pro bìvere s’ìsula in manera dignitosa, ponende sas energias nostras in sas amministratziones locales, in sos assòtzios, in su mundu de sa cultura e de su volontariadu”.
Ma custu aficu non bastat prus. “Totus sos indicadores faghent bìere un’ìsula rue·rue chene diretzione, in sa cale est difìtzile s’immaginare s’imbeniente”.
No est realìsticu, sighit sa nota, “delegare sas solutziones a chie nch’at fatu lòmpere in custa situatzione. Sa Sardigna est semper prus impoverida, ispobulada e depressa. Amus intesu sa netzessidade de agire in manera cuncreta, organizende una mutida pùblica aberta a totus cussos chi, in manera indipendente de edade e esperièntzias pregressas, cherent immaginare e costruere un’ìsula prus giusta, sustenìbile, generativa de oportunidade e democràtica”.
“Serbit una alternativa polìtica – sighit su comunicadu – chi podet donare risultados in manera cuncreta a sas rechestas sotziales e chi persigat una trasformatzione profunda de su cuadru sotzio-econòmicu cun progetos credìbiles e pragmàticos”. Pro la costruere s’ùnicu caminu “est sa de imbucare in su dibatu pùblicu sos bisòngios e sos progetos de cambiamentu de sa majoria de sas persones chi bivent in manera cuotidiana sos discumbènios e sas potentzialidades de custa terra”.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
