In un’artìculu de sa chida colada amus proadu a contare, belle in direta cun su favore de su fusu oràriu, su blitz americanu in Venetzuela. E mancari iscamus chi no est totu su chi podet essire a campu in contu de relatziones internatzionales, amus ghetadu duas paràulas pro su chi pertocat sas cortes de domo: s’ucraina pro Mosca e sa de Taiwan pro Pechinu.
Sos tempos de sa crònaca (fìamus galu isterrende su petzu chi galu non s’ischiat in ue nche paraiat Maduro) non nos ant dadu su tempus de chistionare de Groenlàndia, pro nàrrere; ma si fiat pòdidu previdire sos chi sos protetores istràngios de sa Repùblica bolivariana fiant reagende cun sa matessi partetzipatzione emotiva de unu notaju autentichende unu fallimentu.
Sa reatzione inesistente de sas fortzas armadas venetzuelanas at agiuntu pane a brou e in medas amus istèrridu dudas, belle arrivende a sa dietrologia. Como però essit a campu chi s’idea de s’iscàmbiu no est cosa noa.
Dae carchi die nos sunt contende de una manovra betza de carchi annu. Fiat su 2019 e narant chi sa Rùssia aiat giai dae tando propostu a Trump de li lassare manu lìbera in Ucraina in càmbiu de su Venetzuela. Testimòngia de totu s’ex cussigera de su presidente Usa Fiona Hill, fèmina de s’intelligence e in intro de su National security council finas cun Bush e Obama.
E semper in custas dies amus bidu pòdidu lèghere giustu carchi cosighedda dae Mosca in riferimentu a su blitz de sos sordados a isteddos e istrìscias pighende·si·nche sa petrolera Marinera mancari in presèntzia de sutamarinos russos. Su messàgiu est craru: «Dae sa Groenlàndia a s’Amèrica latina, s’emisferu otzidentale est su nostru».
E nois sardos in cale emisferu nche semus? Custa dimanda non pertocat a nois ebbia a ma a totu sos pòpulos. Si finas istados sovranos sunt tratados che figurinas de iscambiare, ite est chi devent galu bajulare sas natziones privas de istadu? Ite tipu de autodeterminatzione bi diat pòdere àere in custu mundu chi reconnoschet petzi sos raportos de fortza militare?
Su de èssere sutamissos a sa Nato a ghia americana amus bidu a ue nos nch’at giutu. Ite ispàtziu diamus àere in s’Europa de su riarmu? Diamus istare mègius in intro de sos Brics? Pro comintzare nche diamus pòdere lassare a banda su sustegnu a una banda o a s’àtera. Chi non bastat e cambiare su mundu. Ma nessi a cambiare nois.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
