“Legare sas tzitades a sa natura, andende in prus de sa lògica oramai superada de sa partzidura de padentes e tzentru abitadu”. Custu s’obietivu de s’istùdiu portughesu de architetura de su paesàgiu chi, ghiadu dae s’architetu de fama internatzionale João Ferreira Nunes, at a progetare s’Aneddu sustenìbile de sa Tzitade Metropolitana de Casteddu.
S’intentu est su fàbbricu de un’infrastrutura pro connètere sas zonas naturales e urbanas de sos 17 Comunos de s’àrea ampra. Nunes at giai traballadu a Casteddu ue at progetadu su parcu de sos aneddos in su bighinadu de Santu Elia.
Sas primas ideas de su progetu ant a èssere finantziadas cun 102 milliones de èuro giai assignados a sa Tzitade metropolitana de Casteddu gràtzias a su Pnrr. Si tratat de una pariga de interventos de valorizatzione chi pigant ispunto dae sos printzìpios de cambiamentu climàticu e de mobilidade lenta. Sas ideas sunt istadas presentadas in sas dies coladas a sa presèntzia de Nunes. S’architetu in Casteddu at bisitadu sas printzipales àreas individuadas pro sa realizatzione de sos interventos. “Apo a chircare de rèndere cuncretas sas ideas bostras pro costruere un’infrastrutura birde e sustenìbile”, at ispiegadu s’architetu João Nunes.
Tra sos progetos propostos dae sos Comunos b’at s’impreu de sas bias de abba de Pauli, Ceraxius, Cuartùciu, Cuartu e Casteddu, sa ricualificatzione de sos mercados tzìvicos – in particulare San Benedetto in Casteddu e su Mercadu tzìvicu de Pauli – sa realizatzione de unu parcu a s’ex aeroportu, semper in Pauli, òperas chi ant a connètere Sètimu cun sa pinneta de Sìnnia, un’asse urbanu de sa cultura in Cuartùciu, megiorias a sa Laguna de Santa Gilla a Su Masu.
In prus est in mente una creatzione de percursos pro bitzicletas de collegamentu cun sos bighinados subra de sa costa in Cabuderra, sa valorizatzione de s’àrea archeològica de Monte Mereu a Santu Pedru, sa creatzione de unu passadissu de sos parcos tzitadinos e sa ricualificatzione de su fronte mare in Sarrocu, e in fines s’istitutzione de un’àrea marina a Pula.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
