Eris a note Giuseppe Conte, in una cunferèntzia de imprenta, at fatu ischire cale ant a èssere sos provedimentos noos leados dae su guvernu pro abrandare s’ispàinu de su coronavirus nou (Sars-CoV-2).
Como totu s’Itàlia est cussiderada zona ruja e in totu su territòriu natzionale faghet a s’ispostare petzi pro traballu, motivos de salude o pro netzessidade. Sos ispostamentos si depent motivare cumpilende una autotzertificatzione chi si podet iscarrigare dae su giassu ìnternet de su ministeru de s’internu (custa).
Est proibidu a tènnere atòbios a s’abertu e in logos pùblicos.
Finas a su 3 de abrile sas iscolas e sas universidades ant a abbarrare cungiadas.
Ristorantes e tzilleris podent abèrrere a su pùbblicu finas a sas 6 de merie.
Òbligu de serrada pro sos pub, salas de ballu, salas de giogu, museos, tzìnemas, teatros e logos de recreu.
Òbligu de firmu pro totus sos eventos isportivos, fintzas pro su campionadu de fùbalu de sèrie A.
Niscuna limitatzione, pro s’ora pro sos trasportos pùblicu.
Sa Cei (Cunferèntzia episcopale italiana), Comente giai annuntziadu s’8 martzu, at dispostu su suspendimentu de sas missas in totu Itàlia finas a chenàbura su 3 de abrile.
Segundu sos datos de sa protetzione tzivile fatos a ischire eris a meria, in Itàlia dae su cumintzu de s’epidèmia sas persones cuntagiadas dae su coronavirus nou sunt istadas 9.172, de custas 463 si nche sunt mortas e 724 sunt curadas. Tra sos 7.985 positivos, 2.936 sunt in isulamentu in domo, 4.316 ricoverados cun sìntomos e 733 in terapia intensiva.
Est semper sa Lombardia sa regione prus corpida, cun 5.469 casos, sighint s’Emìlia-Romagna cun 1.386 casos e su Vènetu cun 744 casos. Grave meda sa situatziones in sa provìntzia de Bèrgamu, in ue finas a eris si contaiant 1.245 casos.
Su guvernu at annuntziadu chi in sas dies sighentes at a emanare unos cantos providimentos econòmicos pro agiudare tzitadinos e siendas. Su vice-ministru de s’economia Antonio Misiani at naradu chi su guvernu est prontu a ponnere prus de 7,5 milliardos in deficit pro agiudare sas famìlias e sas impresas”. L.M
