Comente reconnòschere una ‘fake news’: ddu ispiegat unu lìbburu online Una ghia in italianu pro cumprendere cando seus ligende una fàula bistia de informatzione

Unu lìbburu pro imparare comente reconnòschere is noas dae is fàulas publicadas in is social network e Ìnternet in s’interis de una crisi. Est su ‘Verification handbook’, est istadu publicadu in su ghennàrgiu 2014 e podet agiudare giornalistas e chiesisiat in totu su mundu, duncas in Sardigna puru, ligit informatziones online.

Su lìbburu est istadu iscritu dae giornalistas chi traballant in televisiones e giornalis comente a sa Bbc, Storyful, Abc, Digital first mèdia e unos àteros espertos de fact checking, s’atividade chi permitit de compidare si unu fatu est beru comente narant.

Cussu de sa beridade est sempri istadu unu problema mannu pro is giornales. In s’istòria de su giornalismu no fartant esèmpios de informatziones cuadas pro acuntentare s’interessu de calicunu chi no est su letore, comente imbetzes diat dèpere èssere. Un’editore o unu guvernu, pro nàrrere.  Ma sa chistioni de sa beridade est divènnida tzentrale dae cando sunt arribados Facebook, Youtube e àteros social network chi permìtint a dognunu de iscrìere o publicare cussu chi bolet a in antis de meda personas. E custas cando lìgint, meda bortas no tenint istrumèntos pro distìnghere un fatu dae una fàula.

Duncas unu lìbburu comente su ‘Verification handbook’ est de importu pro ite donat cussìgios e tècnicas de sighire mescamente cando nche sunt disacatos o situatziones de crisi. Pro is giornalistas, su manuale frunit cussìgios atuàbiles pro fatzilitare sa preparatzione a sas catàstrofes in redatziones e pro averguare e impreare informatziones, foto e video chi arribant dae sa truma.

Su lìbburu si podet iscarrigare dae su giassu verificationhandbook.comest istadu traduidu in medas lìmbas e puru in italianu. Innoghe agatais sa versione in Pdf.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.