Baristas, meres de tzilleris, pizzerias e ristorantes dae una banda, dae àtera istrutores e gestores de palestras. Nche sunt istadas duas manifestadas diferentes oe in Casteddu ma ambas duas contra is règulas noas chi at impostu su decretu Dpcm firmadu domìniga dae su presidente Giuseppe Conte pro parare fronte a su Coronavirus.
Dae lunis difatis, finas a su 24 de onniasantu, is palestras ant a dèpere abarrare serradas, mentras bar e ristorantes tenent s’òbligu de cungiare a is ses de su sero. Unu disacatu mannu pro duas categorias chi sunt istadas giai dannificadas meda in su primu cungiamentu tra martzu e maju. Su chi pedint a su Guvernu, ma finas a sa Regione, essende chi s’Autonomia ispetziale diat pòdere donare sa facultade de mudare is oràrios, est de ispostare sa serrada de is locales a is ùndighi de note e de torrare a abèrrere is palestras. Custu pro ite, narant, in custos logos su contàgiu est istadu bàsciu meda.
In pratza de su Cramu sa protesta est istada cuncordada dae sa Fipe-Confcommercio, s’organizatzione chi rapresentat is chi traballant in su setore de tzilleris e ristorantes: custu mangianu duas chèntinas de persones, a unu metru is unas dae is àteras, si nche sunt sètzidas in sa pratza ponende in terra pratos e frochitas. Comente pro nàrrere “semus a terra e custa est sa fine de s’atividade nostra”. A dae in antis de su Consìgiu regionale imbetzes ddoe est istada sa manifestatzione pro s’abertura de is palestras, una chèscia prus pagu organizada de sa prima, cun sa gente a camba e a pagu tretu is unos dae is àteros.
