Dae pagu amus contadu – movende dae istùdios chi sa cosa l’ant ischida contare – de cantas partigheddas de plàstica nche finit a intro de nois. Pagu prus o mancu una cantidade che pare a una carta de crèditu. Su problema de sa plàstica est duncas una chistione chi cheret posta in agenda cun atziones dèghidas pro chi sas paràulas non si nche las pighet su bentu. B’ant a resèssere sos Comunes sardos?
A como sos Comunes Plastic Free sunt 111 in totu Itàlia e sete bi nd’amus in Sardigna, est a nàrrere su de Santu Franciscu di L’Aglientu, su de Badesi, su de Calteddu, su de Tarranoa, su de Isthintini, su de Teulada e su de Su Masu. Custos ant otènnidu in custas dies su reconnoschimentu a forma de tostoine ideadu e aprontadu pròpiu dae Plastic Free onlus, organizatzione de voluntariadu ativa dae su 2019.
Pro otènnere su puntègiu, custos Comunes ant superadu sas chimbe proas in contu de gherra contra a sos abbandonos illìtzitos, sensibilizatzione de su territòriu, gestione de sos refudos urbanos, atividades virtudosas de s’Ente e collaboratzione cun sa onlus.
«In unu biennu semus colados dae 49 a 111 Comunes – at naradu su presidente de s’onlus Luca De Gaetano –. Pro annoas amus a fatzilitare sa partetzipatzione issoro digitalizende sas protzeduras. Ma su disafiu chi nos tocat est su de s’internatzionalizatzione. Nch’amus a barigare sas làcanas natzionales (italianas, ndr) pro sensibilizare finas a unu milliardu de persones, comintzende dae s’Europa».
A s’eventu de premiatzione, in Milanu, mancari in videocunferèntzia, est intervènnidu su ministru de s’ambiente Gilberto Pichetto Fratin: «Su guvernu est impignadu cuntrastende s’incuinamentu dae sa plàstica cun normas, leges e finantziamentos pro sa chirca, ma bi cheret un’isfortzu colletivu e totu cantos devimus consumare prus pagu reduende sos isprecos e recuperende materiales».
Pro no isballiare comintzent issos cun polìticas dèghidas, chi non nche los ant sètzidos pro bìdere sos resurtados acumpridos dae sos amministrados.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
