“Est s’ora de afrontare su declinu sanitàriu de is àreas de su tzentru-Sardigna”

“Bolimus is servìtzios essentziales, sena de is cales non faghet nemmancu a s’immaginare sa vivibilidade de su territòriu e is prospetivas de isvilupu”. Aici is giòvanos suta is 40 annos de su Gennargentu-Mandrolisai chi ant pedidu, cun una lìtera direta a sa Regione Sardigna, de aprontare polìticas innovativas e balentiosas pro afortigare is servìtzios sòtziu-sanitàrios de su territòriu issoro.

“Creimus chi su tzentru Sardigna tèngiat unu benidore de potentzialidades in su fronte produtivu, sotziale e culturale. Semus impinnados pro ddu contivigiare in diversos àmbitos e modos. Su destinu de is biddas nostras non depet èssere ligadu a ispopulamentu e a s’acunnortu. Tra custos servìtzios ddoe est sa sanidade chi, cun su declinu de is prestatziones e de is orgànicos de su PO San Camillo de Sòrgono, riferimentu pro 17 mìgia persones, arriscat de arribare a unu puntu sena furriada”.

Difatis, dae sa reforma de sa rete de s’ispilades promòvida dae sa amministratzione regionale pretzedente, su PO San Camillo est istadu declassadu a ispidale de zona discumbeniosa, ma a su presente s’adeguamentu prevididu est galu a tesu. Adeguamentu chi diat dèpere batire un’afortigamentu. “Imbetzes, comente acontesset oramai dae annos, est su sinnale de un’mpoberimentu prus mannu, chi corfit mescamente sa populatzione prus dèbiles de su logu nostru, ameletzende su deretu a sa salude e a is curas”.

Is fartas, segundu is giòvanos, interessant prima de totu is infrastruturas, veturas de sucursu e machinàrios (comente a is salas operatòrias firmas pro s’ausèntzia de unu chirurgu e de un’anestesista, o sa mancàntzia de machinàrios isterilizantes pro s’endoscopia), ma fintzas su personale: “Dae 5 meses 1200 patzientes ispetant su càmbiu de su diabetòlogu, ma giai de meda mancat su fisiatra, unu mèigu de guàrdia anestesista, e in prus in su Prontu sucursu ddoe est unu mèigu ebbia de ruolu. In prospetiva, cun is pensionamentos imbenientes, a pustis de su firmu de su repartu de chirurgia, est a arriscu su repartu de meighina generale puru e cun cussu su DH oncològicu chi serbit 600 patzientes”.

“Est duncas lòmpida s’ora de afrontare a manera sèria su declinu de is àreas internas” si leghet in sa lìtera, “ponende in fatu a unas cantas rispostas giai programmadas chi diant pòdere risòlvere in parte sa farta de is deretos basilares garantidos dae tzitadinàntzia. Pedimus a su Guvernu regionale – est sa rechesta de is giòvanos – de incluire in sa missione “Salude” progetos capatzos de rispòndere a is bisòngios chi dae tropu tempus benint disconnotos. Pedimus a s’ATS Sardigna e a s’ASSL de Nùgoro de pònnere mente a is rechestas e de respetare is impignos pigados in passadu, adotende provedimentos pretzisos e acrarende cantas risorsas econòmicas e umanas sunt a disponimentu pro garantire is servìtzios e is prestatziones, e puru s’iscansione temporale netzessària pro lòmpere a is obietivos”.

Sa lìtera pedit a totu is giòvanos suta is 40 annos de cumpartzire s’apellu e de pònnere sa firma issoro e partetzipare a manera ativa a sa discussione, a s’istùdiu e a sa mobilitatzione “pro conchistare su deretu de abarrare in is biddas nostras o pro ddoe pòdere torrare. S’ora de agire est immoe”.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*