“S’Istadu depet respetare cantu prevìdidu dae s’Istatutu ispetziale de sa Sardigna: is benes chi non sunt prus ùtiles a sas funtziones guvernativas depent èssere trasferidos a sa Regione, comente est iscritu in s’artìculu 14 de s’Istatutu. Custu printzìpiu depet èssere aplicadu semper e no a manera partziale comente est acontèssidu finas a ora”.
Ddu narat s’assessore de is Entes Locales e Urbanìstica, Francesco Spanedda in riferimentu a su bandu natzionale de s’agèntzia de su Demàniu pro sa cuntzessione in afitu de benes pùblicos istatales presentes in s’Ìsula. Intre custos b’at fintzas fàbricos importantes: s’ex bateria militare de Capu de Orso in Palau e s’ex Intendèntzia de Finàntzia de Tàtari. In totale sunt chimbe benes, dae Sa Madalena a s’Asinara colende pro Palau e Tàtari.
In is annos, su trasferimentu de is benes istatales est acontèssidu de manera irregulare, faghet ischire sa Regione, a bortas limitende·si a immòbiles in cunditziones crìticas o cun situatziones giurìdicas e amministrativas difìtziles. “A sa Regione – ispiegat s’assessore – est istadu afidadu su còmpitu de valutare e gestire custos benes, a s’ispissu sena informatziones craras e sena unu beru cunfrontu cun s’Istadu”.
Spanedda sighit girende·si deretu a su Guvernu natzionale: “Tocat cumentzare unu cunfrontu politico-istitutzionale pro definire modalidades craras e lestras de trasferimentu de is benes”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
