Sa bandera de sos Bator Moros no at a isbentulare prus in su corridòriu de su Munitzìpiu de Madalena. Su sìndigu, Fabio Lai, nche l’at bogada comente sinnu de protesta a pustis de sa detzisione de serrare a bellu a bellu s’ispidale de s’ìsula, su Paolo Merlo.
“A nde pesare sa bandera mea mi costat meda– at naradu su primu tzitadinu — ma si sos tzitadinos meos non tenent su deretu de si curare, tando mancu custa bandera tenet su deretu de èssere picada in su palàtziu comunale”. Unu gestu, cussu de Fabio Lai, ispiegadu in sa pàgina Facebook istitutzionale, fatu pro chircare de fàghere arribare sos pensamentos suos a totu sa populatzione de Madalena.
“M’ant promìtidu chi su repartu de meighina at a abèrrere torra a pustis chi at a èssere risòrvida s’emergèntzia de su prontu sucursu, ma oramai est impossìbile afrontare sa discunfiantza de sos tzitadinos meos, pro ite deo puru m’intendo comente a issos etotu. Cando su repartu de meighina generale at a èssere torradu a abèrrere, tando apa a pònnere torra sa bandera sarda in Comunu”.
Su primu tzitadinu Fabio Lai aiat protestadu giai eris pro sos sèberos organizativos de sa Sanidade in Gaddura, iscriende fintzas una lìtera a su Ministeru pro pedire de cummissariare s’Ats.
“Su sèberu de serrare unu repartu pro assuprire a sas fartas de un’àteru est un’atu chi mèritat disubbidièntzia tzivile”, osservat Lai. “Sa mesa tècnica pro faeddare de su problema de Madalena iscòviat cantu unos dirigentes de s’azienda sanitària siant inadeguados, sende chi non sunt istados capatzos de prevìdere e prevènnere un’emergèntzia de unu territòriu comente sa Gaddura, chi in custu perìodu de s’annu fiat de s’isetare”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
