Est belle totu prontu pro sa de 65 editzione de su Prèmiu Otieri de literadura sarda. S’apuntamentu est pro su 23 de santandria in su teatru tzitadinu e in direta youtube dae su canale de su cuncursu nòdidu. In su mentres s’assòtziu Premio Ozieri Aps chi lu organizat at annuntziadu sos premiados de sas tres setziones “Poesia”, “Prosa” e “Tra poesia e càntigu” seberados dae sa giuria ghiada dea su Prof. Dino Manca (in foto).
Binchet su primu prèmiu de sa “setzione Antoni Sanna” dedicada a sos versos Antonello Isoni cun sa poesia intitulada “Tarra di gherra e di branu”. E cale est custa terra chi essit a campu dae su cumponimentu? Non la nomina. Diat pòdere èssere sa Palestina, o puru sa Sardigna: «Da l’orizonti méu ti icu / amàta tarra / ill’undi drummiti / di li mé’ dumani / e strinta ti tengu / tu chi firùta aggànti / e d’innuzzènti accoddi li mani / illi dirràmi / d’un riu gàrrigu / rùiu, chen’èa».
Primu de sos contos (“setzione Toninu Ledda”) est imbetzes su de Domenico Battaglia intituladu “Tra Infernu e Paradisu”. «S’autore – custu su cummentu de sa Giuria – ammanìgiat sas informatziones cun un’andanta contemporànea e una limba contivigiada. Est un’istòria de onni die: una mama non podet bajulare s’amiga corale de sa fìgia e pro cussu nde faeddat male. Sa mirada de su contu però lassat pagu a sa retòrica o a sa cundenna, ma sighit sas acontèssidas e sos crastulos, ca at a èssere s’ostinu a fàghere giustìtzia». «E suttu una luci nóa – gasi sa serrada de su contu -, g’aìa truàtu i culóri du so Paradisu»
De sas poesias chi si podent cantare (“setzione Antoni Cubeddu”) binchet unu poeta chi no est prus cun nois, Servadore Mùrgia, autore de “A s’amigu caru Bannantoni Busio”. Unu “bator trobojadu” chi est una risposta a unu “trintasete” retzidu in antis («Su bellu trintasete retrogadu / chi pro me as iscritu e fatu aposta / l’apo gradidu meda, e sa risposta / t’imbio in custu bator trobojadu»). Una bella testimonia epistulare e poètica chi aunit traditzione iscrita sarda, oralidade e, difatis, càntigu. «Chie at connotu a tziu Mùrgia non podet fàchere a mancu de ammentare sa sapiesa sua, su bonu coro, s’afetu e s’istima chi ischiat mustrare a amicos corales e astrintos», narant sos giurados. Custa sa serrada: «ancora iscrio e canto in tonu antigu / e che amigu a tie azudu peda. / T’imbio custu bator trobojadu / ch’apo su tou aggradessidu meda».
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
