Dae lunis sa Sardigna torrat a s’acorrare pro more de su virus Corona.
S’abrandamentu de is limitatziones de sa zona bianca, difatis, est duradu bellu pagu, tres chidas ebbia. A pustis de unas cantas chidas in zona arantzu, sa Sardigna nch’est acabbada in zona ruja. Dae lunis 12 abrile s’ìsula, chi in s’ùrtimas dies at bidu crèschere su nùmeru de is contàgios, tenet su gradu Rt prus artu de Itàlia, est a nàrrere 1,54, prus de sa mèdia de su 1,25, addae de sa cale si ruet deretu zona ruja.
Duncas, belle 63 mìgia istudiantes sardos de segunda e de tertza mèdia e de is istitutos superiores no ant a andare prus a iscola e ant a fàghere letzione dae dono issoro cun sa didàtica a distàntzia. Totu a s’imbesse de su chi est capitende in àteras regiones de Itàlia. Difatis, ant a èssere 6,6 milliones sos iscolanos chi ant a torrare a iscola. In Sardigna imbetzes, a càusa de s’agraviamentu de su contàgiu, medas istitutos ant firmare is letziones in presèntzia. Diversu at a èssere pro is pipios e pitzocheddos de s’iscola de s’infàntzia, de sa primària e de su primu annu de is mèdias, chi ant a pòdere sighire a fàghere letzione.
Però sunt medas is comunos acanta sunt galu in vigèntzia is ordinàntzias sindacales de serrada de totu is iscolas, a pustis de s’aumentu de is contàgios. In mesu a custos ddoe est Nùgoro, in ue totu is istitutos ant a abarrare cungiados finas a su 20 de abrile, posca S’Alighera, acanta ant a torrare a abèrrere martis u 13 de abrile, e Aristanis, in ue galu non s’ischit cando s’at a pòdere torrare a iscola.
“A dolu mannu semus paghende sa trascuradesa de is chidas coladas- at naradu su guvernadore de sa Sardigna Christian Solinas – acanta non s’est donadu meda atentu”. Ma semper segundu su presidente de sa Regione “si amus a sighire cumportamentos prus curretos, amus a pòdere essire a sa lestra dae custa situatzione”.
“Ascurtende su Presidente — at cummentadu Francesco Agus, consigieri de is Progressistas — sas responsabilidades non diant dipèndere dae sa sanidade sarda e dae sa gestione mala meda de su pianu vatzinale, ma est curpa de is tzitadinos chi no ant respetadu is règulas. Diat èssere unu fatu grave meda si tra custos ddoe diat èssere gente a costadu de su Presidente”. Agus at naradu custos faeddos non pro de de badas, difatis in is dies coladas, in Sàrdara, 20 persones sunt istadas santzionadas pro àere partetzipadu a unu pràngiu in unu ristorante, mancari is limitatziones anti-covid. E tra is multados identificados dae sa Guàrdia de Finàntzia, ddoe sunt fintzas polìticos e dirigentes regionales.
“Non si podet baliare — sighit Agus — chi is règulas balant solu pro sa gente normale e non pro una pitica casta chi pensat de pòdere fàghere totu su chi cheret”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
