Un’iscoberta ispantosa diat èssere cudda fata in su sartu de Baunei ue una truma de chircadores chi depiat realizare unu documentàriu at agatadu in sa pedra arrastos fòssiles chi benint dae s’edade de su Giuràssicu.
De s’iscoberta nd’at allegadu sa sotzietade de produtzione videu General Business Management. In una nota imbiada a is giornales, s’amministradore Francesco Ginesu narat chi est sa primu borta chi benint identificados arrastos chi cunfirmant sa presèntzia de dinosàuros in Sardigna.
De su grupu de chirca faghent parte is professores Antonio Assorgia, Sergio Ginesu e Stefania Sias chi giai traballaiant in is Universidades de Tàtari e Casteddu.
“Is arrastos, cunservados in rocas de s’edade de su Giuràssicu, apartenent a unu dinosàuru teròpode finas a oe mai signaladu in Sardigna – sighit su comunicadu -. S’iscoberta, ispantosa, at permìtidu de torrare a costrùere s’animale e s’ambiente in ue biviat: unu predatore bìpede chi si moviat longu tretos de costa caraterizados dae fundos arenosos e fangosos, tìpicos de is àreas marinas.”
àteras imagines de comente diant podere èssere istados dinosàuros in Baunei. (Dae facebook de Francesco Ginesu)
In piessignu su dinosàuru benit collocadu in su Giuràssicu mesanu, 165 milliones de annos a oe. In prus sa pedra in ue is arrastos sunt istados agatados diat ammustrare finas sinnos de àteras genìas de animales de su matessi periòdu.
Comente iscriet La Nuova Sardegna chi at sighidu s’addòbiu de imprenta fatu oe in Tàtari, a su dinosàuru “sardu” dd’ant postu “Bibi” comente nomìngiu. “Custa iscoberta est sa crae chi aberit unu mundu nou” at naradu s’espertu Sergio Ginesu mentras su paleontòlogu de s’Universidade de Tàtari, Marco Zedda at ispiegadu comente dae unu simpre arrastu si podet torrare a costrùere s’animale chi dd’at lassadu: “Su de Baunei fiat cun probabilidade un’erbìvoru, bida sa farta de brancas e fiat unu bìpede longu intre 120 e 160 tzentimetros”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
