In Mìris torrat su programma de residèntzias artìsticas internatzionales de Nocefresca chi donat a artistas de totu su mundu sa possibilidade de bìvere un’esperièntzia in Sardigna. Su programma de residèntzias artìsticas, a incuru de Francesca Sassu, est cumentzadu in Mìris (Milis in italianu) su 3 de maju e at a acabbare su primu de nadale, cun sa pàusa istiale de trìulas e austu.
Fintzas ocannu s’azienda culturale Nocefresca at seberadu su burgu rurale de Miris comente logu de acumprimentu de totu sas fainas. S’abitòriu istòricu de Casa Bagnolo at a èssere sa sede de sos ispàtzios de traballu ue ònnia artista at a tènnere s’istùdiu suo e at a pòdere atobiare su pùblicu.
Sos allògios ant a èssere partzidos in sa bidda gràtzias a s’agiudu de sos abitantes de su logu chi ant seberadu de suportare su progetu atzetende de afitare sas segundas domos issoro pro sa permanèntzias de sos artistas, diversas dae sa bìsita clàssica de su turista.
Nocefresca at seberadu de tràere ispiratzione dae sa terra, ocannu di fatis su progetu si mutit ‘Lands’, elementu primàriu de ònnia tziviltade agrìcula, pro connòschere sos protzessos geològicos chi donant vida a su terrinu e pro nde cumprèndere sas orìgines.
“Sa terra ue caminamus, ue costruimus tzitade e ue praticamus s’agricultura est petzi sa parte prus superfitziale de unu muntone de materiales depositados a livellos diferentes de profundidade. Custos pìgios, chi sos geòlogos mutint ‘orizzonti’ (orizontes), si sunt formados in su tempus a traessu de protzessos cumplicados e mudadas. S’editzione 2022 de Nocefresca si proponet de andare a traessu de custos orizontes, los osservare e los connòschere pro andare prus a in antis, immaginende istratificatziones noas”.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
