Sardigna e Sassònia unidas conca a s’obietivu: acasagiare in paris s’Einstein Telescope, su rilevadore de undas gravitatzionales de ùrtima generatzione chi at a cunsentire a sa comunidade sientìfica internatzionale de istudiare s’istòria de s’universu, finas dae sas orìgines suas.
S’ufitzialidade de sa cooperatzione intre Itàlia e Germània est arribbada oe cun un’acòrdiu sutascritu dae sa Regione Sardigna e dae s’Istadu lìberu de Sassònia in sa sede de su Ministèriu de s’Universidade e de sa Chirca. Nche fiat finas sa ministra Anna Maria Bernini, sa presidente de sa Regione Sardigna Alessandra Todde, su presidente de sa Sassònia, Michael Kretschmer (in lìnia), su Ministru de sa Sièntzia sàssone Sebastian Gemkow, e sos rapresentantes de sas duas comunidades sientìficas.
Ambas regiones sunt candidadas pro fraigare custa infrastrutura tecnològica de importu: sa Sardigna in s’àrea a inghìriu de sa mina de Sos Enattos in Lùvula (Nùgoro), sa Sassònia in su territòriu de sa Lusàtzia. S’acòrdiu decretat una cooperatzione istratègica intre Itàlia e Germània in bista de sa possìbile realizatzione de s’infrastrutura in una cunfiguratzione chi previdet duos osservadores gemellos in sos territòrios candidados de Sos Enattos (Sardigna) e Lusàtzia (Sassònia).
“S’Einstein Telescope – narat su ministru de s’Universidade e de sa Chirca, Anna Maria Bernini – est unu progetu de chirca mannu a beru e rapresentat un’investimentu istratègicu in su benidore de sa sièntzia, in sas tecnologias avantzadas e in sa capatzidade de s’Europa de abarrare cumpetitiva in su mundu. Sa cooperatzione intre Sardigna e Sassònia mustrat comente territòrios diferentes pro istòria, geografia e traditziones potzant traballare in paris”.
“Oe est una die importante pro su percursu chi amus cumentzadu cun sa candidadura de su situ de Sos Enattos a acasagiare s’Einstein Telescope”, cummentat sa presidente de sa Regione, Alessandra Todde: “Dae su primu momentu no amus bidu sa candidadura de sa Sassònia comente perìgulosa pro su caminu nostru. A s’imbesse amus collidu sa possibilidade de unire sas fortzas pro arribbare paris a un’obietivu chi sa comunidade sientìfica abetat”.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
