Fiat su 12 de abrile de su 1970 e fiat de domìnigu. Oe est su 12 de abrile etotu, e est domìnigu. Sunt chimbant’annos, chimbant’annos de ammentos, de onore e de istòria. Fiat sa prima borta chi un’iscuadra de su sud Itàlia binchiat sa Serie A, sa prima borta chi un’iscuadra pitica si lassaiat a palas cussa prus arricas: Juventus, Inter, Milan. Sa prima borta chi su Casteddu binchiat s’Iscudetu, s’unicu de s’istòria sua.
Davide contra a Golia, ant naradu meda bortas. Est beru: agiunghimus pòberos contra arricos. Eja, pro ite in is annos Sessanta sa Sardigna fiat giai una terra de disterru e s’istereòtipu boliat chi su sardu pro sa gente de foras esseret prima de totu unu pastore o unu bandidu. Unu pastore chi andaiat a buscare traballu in is tzitades prus mannas e medas bortas cumentzaiat faghende traballos de nudda. Castiadu male. S’intendiat in s’istàdiu puru: “Nos aboghinaiant ‘pastores’, comente chi esseret unu faeddu de ofesa. Ma pro nois fiat un’onore”. Paràulas naradas prus bortas dae Gigi Riva chi sutalìniant comente a suta de un’iscuadra nche fiat unu pòpulu, cussu de sa Sardigna chi biviat in ònnia logu de Itàlia e de Europa, chi pro una borta, in mesu a medas annos de tribulias, gràtzias a su giogu de sa botza, s’intendiat mannu.
Fintzas a cuss’annu fiat unu bisu, chi però su merie de su 12 de abrile 1970, in s’istàdiu Amsicora, est divennidu beru. Duas chidas prima de sa fine de su torneu contra su Bari, duos gol, unu de Rombo di Tuono (s’annomìngiu chi su giornalista Gianni Brera aiat donadu a Riva) e s’àteru de Bobo Gori, aiant incoronadu su Casteddu campione de Itàlia.
Una vitòria nàschida una pariga de annos a in antis, cando dae sa Serie B unu dirigente de sa sotziedade chi si naraiat Andrea Arrica, aiat cumentzadu a fraigare un’iscuadra ispantosa. Fiat istadu issu a comporare a Riva dae su Legnano cando teniat 18 annos, una còmpora chi aiat fatu lòmpere in deretura is sardos in Serie A. Posca a su Casteddu fiant arribados su portieri Albertosi e fatu fatu Brugnera, Domenghini, Poli, Gori, Nené. Totu giogadores chi ant a èssere protagonistas de s’istòria prus bella de s’iscuadra. Paris cun issos s’allenadore Manlio Scopigno, ‘su filosofu’ ddi naraiant, un’òmine chi cando rispondiat a is dimandas de is giornalistas fiat sempri de pagos faeddos ma chi non lassaiat mai indiferentes.
Scopigno però pro su fùbalu fiat prima de totu s’allenadore de una formatzione istòrica: Albertosi, Martiradonna, Tomasini, Niccolai, Zignoli, Cera, Greatti, Nené, Domenghini, Gori, Riva. Paris cun Brugnera, Poli, Mancin, Nastasio, Reginato. Campiones de un’iscudetu sena fine, chi sighit dae 50 annos. L.M.
