Garantire un’assistèntzia sanitària a is persones prus dèbiles gràtzias a sa tecnologia. Est sa punna de unu progetu pilota aviadu in su Campidanu dae su Gal (grupu atzione locale) pro totu is comunos de su territòriu.
Su Gal at firmadu un’acòrdiu cun sa sotzietade Hvs Technologies de su grupu Inteligea chi traballat pro su megiorare is servìtzios sanitàrios in totu su mundu. Su servìtziu previdet una teleassistèntzia (assistèntzia dae tesu) ativa 24 oras a sa die, dedicada in particulare a mannos, persones fràgiles e cun patologias crònicas chi bivent in su su territòriu.
Sa collaboratzione previdet una prima fase a indonu chi at a durare 90 dies: ant a èssere distribuidas 36 machinetas “sarvavida” (smartwatch e butones de Sos) ligadas gràtzias a Internet a una tzentrale operativa mèdica ativa ònnia die pro totu sa chida e gestida dae personale ispetzializadu.
Is istrumentos assignados a is Comunos de su Gal tenent funtzionalidade de Sos (sucursu), geolocalizatzione, còmpudu de is paràmetros vitales, promemoria pro pigare meighinas e comunicatzione direta cun is sucursos e podent rilevare finas cando una persona ruet. Is familiares e is meigos ant a retzire notìficas e ant a pòdere compidare s’istadu de salude de sa persona chi impreat su dispositivu.
“Custu progetu est un’esèmpiu cuncretu de welfare territoriale fundadu subra de sa tecnologia e s’umanidade. Oferimus unu trastu modernu e atzessìbile pro amparare sa salude e s’autonomia de is persones prus fràgiles, afortiende sa coesione sotziale de is comunidades nostras – narat Stefano Musanti, presidente de su Gal Campidanu –. Sa collaboratzione cun sa sotzietade Inteligea s’insertat in unu percursu prus ampru de innovatzione e inclusione sotziale pro is territòrios rurales, in lìnia cun is obietivos de su Pianu de Isvilupu Locale e de su Programa de Isvilupu Rurale (Psr) de sa Regione Sardigna”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
