Diat dèpere èssere una mina de oro imbetzes paret una promissa eterna. Su treninu birde de sa Sardigna, servìtziu ferruviàriu turìsticu, sighit isetende sa mègius istajone sua. Intre is problemas printzipales b’at sa farta de dinari chi diant serbire a sa fundatzione, nàschida de reghente, pro torrare a nou sa ferrovia. Diant serbire, segundu s’Arst chi gestit su servìtziu, 220 milliones de èuro.
Su dinare diant serbire pro rilantzare is cursas chi in is annos diant àere subidu unu calu costante de passigeris. Est su chi sustenent unos cantos operadores culturales chi dae binti annos traballant in sas biddas longu is 438 chilòmetros de ferrovia.
Is nùmeros (negativos) ddos ant elencados a sa cummissione ‘Guvernu de su Territòriu’ de su Cussìgiu regionale Alessandro Murino, titulare de un’impresa turìstica chi traballat in Ogiastra: “Bìndighi annos a oe su treninu birde carraiat 80 milli passigeris s’annu. Oe semus in duamìgia e su declinu est cumintzadu cun sa gestione de s’Arst”.
A pustis at faeddadu Francesca Marras, socia de sa coop Esedra chi òperat intre is giassos nuràgicos e culturales de Macumere e Bosa: “Su fogu in su Monteferru aiat criadu medas dannos e como b’est istadu su crollu de su ponte. Epuru apamus rechertas fintzas pro su 2027, a is tour operator praghet meda su servìtziu de su treninu birde e diat èssere perfetu pro crèschere is presèntzias turìsticas in s’internu de sa Sardigna”.
In auditzione fintzas su comitadu ispontàneu de Serramanna, ghiadu dae Alberto Mulas, chi at signaladu su problema de intrada a sa ferrovia in su Comunu de su Mèdiu Campidanu e at preguntadu un’interventu definitivu “pro sa viabilidade pedonale finas a s’istatzione ferruviària”.
Pro Sandro Bandinu, titulare de sa “Società di navigazione dei laghi” chi òperat in su Lisa e in su Frumendosa, “semus dae in antis a unu declinu ca a pustis de sa nàschida de sa Fundatzione Treninu birde semus istados esclùdidos dae cale si siat programatzione”.
Segundu s’Arst chi at faeddadu dae in antis a sa matessi cummissione su 26 de làmpadas, est de importu cumprèndere cale siat su progetu de sa Regione pro s’isvilupu de sas fainas de su Treninu birde e at sutaliniadu chi non si tratat de costos ma de investimentos pro su territòriu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
