In intro de un’istiu chi a li nàrrere caente est pagu cosa, sa Sardigna devet fàghere sos contos cun sas cunditziones de sas retes ìdricas suas. Retes pertuntas, sende chi sa metade de s’abba potàbile mai bi lompet a sas iscetas de sas domos.
Si s’istiu est bascosu, sos nùmeros sunt friscos friscos (nessi in s’elaboratzione issoro, ca su riferimentu est a su 2022). Los at publicados s’ufìtziu istùdios de sa Cgia de Mestre, movende dae datos Istat. E cunforma a custos s’ìsula nostra pro pagu non pigat su brunzu in sa classìfica de sos postos peus.
Petzi in fatu a Basilicata (65,5%), Abrutzu (62,5%) e Molise (53,9%) bi semus nois cun 224 litros pro càpite pèrdidos cada die, su 52,8%, prus de 10 puntos de sa mèdia grae italiana (42,4%). Custu isprecu sistemàticu lu traduimus cun 148 milliones de metros cubos de abba frundidos e 436 milliones de èuros de gastos extra. Un’impatu econòmicu chi isporat.
Mirende a sos datos de domo nostra ebbia, essit a campu una mapa interna chi penalizat a forte su nord e su tzentru de s’Ìsula. Sa màllia niedda tocat a Tàtari, collochende·si in sa de ùndighi positziones de sa classìfica de sos cabos de logu provintziales italianos. Inoghe sas pèrdidas sunt a su 63,4%.
In Aristanis sa pertzentuale est de su 60,4, in Nùgoro de su 55,4. Ma fintzas in Casteddu sa situatzione est crìtica: in su cabu de logu regionale si perdet su 53,5% de sa resursa, 264 litros cada die (semper pro càpite) cunforma a sos 493 litros postos in rete.
In custu iscenàriu “brillat” Carbònia cun su 21,7% de pèrdidas. Non sunt datos virtudosos (ca sa virtude est a non nche nd’imbolare) ma sa tzifra est fintzas mègius de sa regionale de s’Emilia Romagna (chi cun su 29,7 est sa regione prus pagu isprecona).
Custos datos nos narant chi su problema de sa sicagna in Sardigna (e galu semus sulenos pro more de sas abbas pròidas s’ierru coladu) no est climàticu ebbia.
Si sa chida colada amus chistionadu de sa rete ferroviària, custu giru semus contende un’àtera prioridade. A cando a las pònnere a beru in agenda?
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
