S’Inferru de Dante Alighieri torrat a bìvere in s’iscuriu de su padente de Seui. Sa note de mèrcuris su 10 de austu un’ispetàculu at antitzipadu su cumintzu de su fèstival SeuInMusica, in programma su 14 e 15 de austu in sa bidda de sa Barbàgia de Seulu.
Una roca illuminada dae lughes ‘infernales’ e sa letura de sos passos de sa Divina Cummèdia interpretados dae s’atore Valentino Mannias acumpangiadu dae su violinu de Marco Castro e cun su cummentu de duos professores de literadura italiana, Andrea Cannas e Duilio Caocci, ant mustradu un’ispetàculu de ispantu.
S’eventu s’est tentu in ‘su presoni de Santu Perdu’, una gruta in su monte cara a su padente de Montarbu. Contant chi esseret impreada comente presone dae sos abitantes de Santu Perdu,unu bidditzolu ispèrdidu. Unu logu chi at acasagiadu ‘Dante in foresta’ s’ispetàculu dedicadu a su de chimbe e de trintatrès càntigos de s’Inferru de sa Divina Cummèdia. Protagonistas assolutas duas intre sas figuras prus populares de s’òpera: Francesca de Rimini e su Conte Ugolino. .
Su fèstival SeuInMusica, cuncordadu dae s’assòtziu culturale Kromatica cun s’agiudu de sa Banda Rossini e cun sa partetzipatzione de s’assòtziu ‘Seuesi a Cagliari e nel mondo’, at a cumentzare domìniga su 14 e lunis su 15 de austu: mùsica dae mangianu a sero, cun ‘jam session’ e aperitivos musicales. In s’editzione de ocannu importante meda sa presèntzia de artistas de contu comente Gavino Murgia e Dj Gruff, in prus b’at èssere fintzas su trumbetista Riccardo Pittau e sos cuntzertos de Hola sa Poyana, Pororoca Trio, Matteo Muntoni, su duetu Follesa&Schirru e sa SeuInStreet band.
Su programa cumpletu e sos agiornamentos de su fèstival si podent agatare in sas pàginas Facebook e Instagram de Seuinmusica.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
