Sa poesia improvisada in Sardigna acostada a sas cantzones modernas de s’hip hop. Est custa s’idea pensada pro su Fèstival de sas Ìsulas de su Mediterràneu, organizadu dae su Teatru Tragodia dae su 13 a su 14 de su mese de cabudanni in Bobadri, sa bidda prus pitica de sa Sardigna.
A su tzentru de sos apuntamentos sas cumpositziones estemporàneas de poetas e cantadores e sos testos issoro, acapiados a s’atualidade de sos rapadores. Posca cantzones, addòbios e initziativas. A dare s’inghitzu a su Fèstival sas notas de poesia e ironia de “Bella, bella, bella…sa Becesa” cun Rossella Faa, martis su 13 de cabudanni a sas 22 in pratza Santa Margherita.
Su cuntzertu ispetàculu de sa cantante, composidora e atora, impreat ritmos de dantza e istòrias beras o de imbentu e ammentos de famìlia. Suta de sos rifletores paris cun issa, su chiterrista Giacomo Deiana e su contrabassista Nicola Cossu.
At a fàghere addobiare espertos e istudiosos s’apuntamentu dòpiu de su 14 de cabudanni. A sas 18,30 su cunvegnu “Poetas Oi e Cras: la poesia improvvisata in Sardegna tra tradizione e innovazione” in sa Corte de su Monte Granatico de Bobadri, pro abèrrere una riflessione subra de s’”istadu de s’arte” de custu patrimòniu culturale chi como connoschet una vida noa, gràtzias a una generatzione de giòvanos poetas, e subra de sas prospetivas, fintzas in raportu a s’afirmatzione de gèneres noos leados dae sa cultura metropolitana e “globalizada”.
Sos reladores sunt sos etnomusicòlogos Ignazio Murru e Sebastiano Pilosu, su rapadore Reverendo Jones, sos “poetas de arrepentina” Alberto Stanislao Atzori e Giampaolo Nuscis, su poeta improvisadore Paolo Zedda.
Finale cun sas rimas improvisadas, su 14 de cabudanni a sas 22 in pratza Santa Margherita cun “Cantendi a sa RAP&ina”: un’addòbiu chi assumet fintzas su sabore de unu “disafiu” intre traditzione e innovatzione, cun su cantautore e rapadore Antonello Pusceddu, in arte Reverendo Jones, e sos poetas improvisadores Alberto Stanislao Atzori e Giampaolo Nuscis e s’etnomusicòlogu Ignazio Murru in calidade de presentadore, pro introduire sas diferentes performance.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
