Federico Carta, in arte Crisa, at bìnchidu su Prèmiu de sa Crìtica a sa prima Biennale de Arte Cuntemporànea intregada a Maria Lai. Su detzisu est istadu proclamadu in giòvia de 29 austu in su museu Camuc de Ulassa, durante una tzerimònia a sa presèntzia de su sìndigu Giovanni Soru, de sa Giunta comunale de Ulassa e de su Cussìgiu de Amministratzione de sa Fundatzione Stazione dell’Arte
Su reconnoschimentu a s’installatzione Cartogramma – unu prèmiu in dinari de 2.500 èuros – est istadu atribuidu dae su diretore artìsticu de sa Biennale, Gianni Murtas, paris cun su comitadu sientìficu cumpostu dae Antonello Carboni, Chiara Manca e Damiano Rossi, e de sa diretora de su museu Man de Nùgoro Chiara Gatti.
“M’intendo a beru piticu in antis a custa prèmiu. Sos artistas in mustra fiant totus de livellu artu meda, pessones chi apo semper ammiradu e istimadu. Creo chi, in custa mustra, apamus bintu totus”. Custas sas paràulas de Crisa a pustis de àere retzidu su prèmiu.
“Cartogramma resesset a coniugare s’originalidade tècnica e compositiva de sos limbàgios de sa “street art” cun unu ligàmene craru a su traballu de Maria Lai” at naradu Gianni Murtas, diretore artìsticu.
Crisa (Federico Carta) naschet in Casteddu in su 1984. Autodidata, isperimentat su disinnu giai dae pipiu e cumintzat giòvanu meda a pintare grafitos subra de sos muros. Sa chirca sua, interventos de street art o arte caraterizada dae una pintura chi si serbit de materiales de recùperu, pertocat temas ligados a su degradu de s’ambiente e a su raportu òmine/natura.
Sa prima Biennale de arte cuntemporànea de Ulassa at a èssere visitabile finas a domìniga 6 de santugaine 2024. In mustra, tra sa Stazione dell’Arte e su museu Camuc, sos traballos de 25 artistas mutidos a si cunfrontare cun s’òpera de Maria Lai.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
