Una testimonia de Emiliano Deiana, ex presidente de Anci Sardigna, torrat a pònnere s’atentzione subra su dramma de is listas de isetu e de is problemas in is ospidales. Una fèmina de sa Gaddura, malàida oncològica, at proadu a prenotare una Tac Total Body netzessària pro averguare s’istadu de sa maladia. S’addòbiu dd’ant fissadu belle in deretura pro su 23 de cabudanni, narat Deiana, però sa prestatzione dd’ant agatada in Murera a is 8 de su mangianu: 300 chilòmetros de distàntzia.
“Tres oras e 45 minutos de màchina in un’istrada bisestrada pro andare e tres oras e 45 minutos pro torrare. Torro a repìtere: malàidu oncològicu giai debilitadu”, iscriet Deiana.
Si su malàidu boleret una sede prus serente, is alternativas non diant èssere mègius: “Pauli 12 martzu 2026. Tàtari 7 maju 2026. Nùgoro 5 santugaine 2026”. Datas chi rendent ladina sa gravidade de su problema de is listas de isetu.
Dae in antis a custa situatzione, sa fìgia de su malàidu at detzìdidu de ricùrrere a unu tzentru privadu, finas a costu de sacrifìtzios econòmicos. “Ca est una bìsita chi non podet èssere prorogada e sa vida de sa mama balet meda de prus de su tempus, de s’ispàtziu, de sa geografia, de is istradas bisestradas, de deghe pizzas cun is amigas, de unu donu a is netas, de unu biàgiu pro sese. Chie imbetzes no si lu podet permìtere agabbat de fàghere sa chirca subra de su Cup e morit”, denùntziat Deiana.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
