Unu logu pro chi depet parare fronte a una maladia oncològica acanta agatare agiudu e retzire suportu psicològicu, atentzione a sa bellesa e mescamente a sa cura de sos pilos. In Loceri at a abèrrere “Alice, un angelo per capello” pro donare, gràtzias a s’Assòtziu Charlibrown, un’agiudu a sas fèminas malàidas de tumore o chi sufrint de ispinniadura (in italianu alopecia).
S’initziativa si proponet de abèrrere una “domo” pro regòllere sos tzufos de pilos e ofèrrere a sas fèminas in cura parrucas ma puru cussìgios pro pònnere fronte a sos efetos negativos de sas terapias. Su sìndigu de Loceri, Gianfranco Lecca, sutalìniat su balore de su progetu: “Ideas comente a custa cunfirmant chi ognunu de nois podet fàghere meda pro sustentare chie sufrit”.
“Ogni sede noa est un’oportunidade in prus pro totu sas fèminas chi afrontant su càncaru o s’ispinniadura – at cummentadu Paola Piroddi presidente onoràriu de s’Assòtziu Charlibrown – de leare parte a sa grandu cadena de donos chi posca divenint laboratòrios de bellesa. So cuntenta meda de èssere inoghe pro cumentzare un’istajone noa de agiudu a sas fèminas in Loceri e in Ogiastra”.
S’Assòtziu de volontariadu Charlibrown est naschidu in su 2016 e at giai cunsignadu belle 5.000 parrucas gràtzias a regorta de pilos in totu s’ìsula. Sa distributzione est su balore in prus de custu progetu chi ponet in motu una solidariedade manna afortiada dae sa collaboratzione cun sa ‘Fair Fashion’ de Bologna, impresa chi òperat in su mundu de sos pilos dae prus de baranta annos e a sa cale benint imbiados sos tzufos collidos. Su progetu est dedicadu a Alice, una pipia morta a s’edade de duos annos pro more de sa leutzemia.
“Est de importu sutaliniare chi su servìtziu de donatzione de sas parrucas est totu de badas – narat Paola Piroddi – nos auguremus chi in Ogiastra naschet una retza de voluntàrios, tzentros estèticos e parruchieris chi si potzant fintzas ocupare de sa collida de sos pilos”.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
