Chenàbura in su Teatru Adrianu de Casteddu espertos de sardu e ladinu, cun una delegatzione chi benit dae su Trentinu Südtirol, si cunfrontant subra de sa valorizatzione de sas limbas minoritàrias.
Chenàbura 15 de santandria a sas 19 su Teatru Adrianu de Casteddu acasàgiat s’eventu “Davegnir Impari – Ladini e sardi: impegno comune per le minoranze linguistiche”. At a èssere un’addòbiu pro faeddare de su valore de sas limbas minoritàrias istòricas reconnotas dae sa lege 482 de su 1999 chi tutelat e promovet sas traditziones linguìsticas de unas cantas comunidades italianas.
S’eventu,organizadu dae s’assòtziu culturale Babel in paris cun s’Istitutu Culturale Ladinu “Majon de fascegn”, s’at a abèrrere cun una dibata subra de sas limbas minoritàrias a su cale ant a pigare parte Tea Dezulian e Sabrina Rasom de s’Istitutu Culturale Ladinu, Luca Guglielmi assessore a sas minorias linguìsticas de su Trentinu-Südtirol, Andrea Dettori capu de gabinetu de s’assessore a sa Cultura de sa Regione Sardigna, Tore Cubeddu fundadore de MyCulture+ e diretore artìsticu de su Babel Film Fèstival, Paolo Carboni, regista e diretore artìsticu de su prèmiu Kentzeboghes e de su Babel Film Fèstival.
In s’interis de s’addòbiu at a èssere projetadu su curtzumetràgiu in limba ladina “Al dì de doman” realizadu dae unos cantos giòvanos de sa Badde de Fassa chi ant leadu parte a su laboratòriu de produtzione tzinematogràfica “Troupes” promòvidu dae s’Istitutu Ladinu in collaboratzione cun s’assòtziu Babel. Sa serada s’at a concruire cun unu cuntzertu de sas bandas Popcorner (Baddes de Fassa) e Folk&Roll (Sardigna).
S’addòbiu faghet parte de sa de sete editziones de su prèmiu Kentzeboghes pro sa promotzione tzinematogràfica in sas limbas minoritàrias. Kentzeboghes est sustènnidu dae s’assessoradu a sos Benes culturales e Ispetàculu de sa Regione Sardigna e de sa Fundatzione de Sardigna, e est realizadu in collaboratzione cun sa Sotziedade Umanitària de Casteddu, Carbònia e S’Alighera, Babel Film Fèstival, Rts – Radio Televisione Sarda, EjaTV, Areavisuale Film, Terra de Punt, Fondazione Sardigna Film Commission e àteros partners natzionales e internatzionales.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
