Comente sunt andende is cosas a duos annos dae is protestas pro su late

Foto de su 2019

In custas dies, in su freàrgiu de su 2019, is caminos sardos fiant biancos de su late imboladu pro protesta dae is pastores chi aiant cumintzadu una gherra desemplada, contada dae totus is giornales. A duos annos dae cussas chèscias is allevadores sunt torra prontos a falare in istrada, sende ca is “promissas de sa polìtica non sunt istadas mantènnidas e dae tando no ddoe est istadu perunu cambiamentu. Is pastores sardos sunt galu isetende una mesa regionale e ministeriale chi donget règulas seguras pro istransire in custu modu su podere de “is industriales chi sighint a fàghere cartellu”.

Sa batalla, chi at bidu protagonistas chèntinas de berbegàrgios e is famìlias issoro in is caminos de totu s’ìsula pro “torrare a donare dignidade” a unu setore intreu, duncas at a sighire. “Semus afelonados”, ant naradu is pastores. “Is industriales sunt sighende a pagare su late a 85 tzentèsimos, ma in base a is cuotatziones su prètziu diat dèpere essere subra s’èuru. Totu custu sena chi nche siat unu cuntratu, chi diat àere dèpidu isvilupare s’Organismu interprofessionale late ovinu sardu (S’Oilos), e duncas sena garantzias pro is allevadores chi sunt leados a truba dae is industriales”.

Segundu Gianuario Falchi e Nenneddu Sanna, portaboghes de is pastores sena bandera, “mancat unu documentu chi diat àere dèpidu individuare unu prètziu de riferimentu de su late cun unu ligàmene deretu a sa cuotatzione de totus is tipologias de casu, de su recotu e de is costos de produtzione”.
Sunt colados duos annos dae cussas protestas famadas, e pro immoe est totu firmu. Andant a in antis is protzedimentos in tribunale ebbia. Deghinas de pastores difatis sunt imputados de “manifestatzione no autorizada” e “blocu istradale”.

Ma pròpiu dae foras de su tribunale est torrada a cumentzare sa gherra de su late. “Tocat a tratare cun Regione e Ministeru — ant naradu is pastores — pro tènnere is règulas chi mancant. Non podimus atzetare chi, cun s’iscusa de su virus Corona, su problema non bèngiat risòlvidu e ismentigadu”.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*