Intre crònaca e anàlisi de sa sotziedade, intre documentu e crìtica. Sunt is iscatos de Mario Pes fotògrafu sardu, bìvidu in sa prima metade de su Noighentos, chi at fotografadu sa Sardigna in is annos de cambiamentos profundos. In Casteddu dae su 18 freàrgiu a su 4 de abrile in s’ispàtziu Search, a suta de su Munitzìpiu, at a aberrere una mustra de is fotografias suas organizada dae sa domo editora Ilisso. Su tìtulu de sa mustra est “Sa Sardigna intre traditzione e modernidade”.
Mario Pes naschet in su 1887 e morit in su 1963. Benit dae sa famìlia de is marchesos Pes de Villamarina de Tèmpiu. Paret destinadu a una carriera comente a capostazione ma s’adesione sua a is valores sotzialistas andant contra a su Fascismu. Dae dificultade a oportunidade, comente iscriet Enrico Pinna in un’artìculu publicadu dae SardiniaPost, sa pèrdida de su traballu custringit a Pes a nde chircare unu nou. Gosi aberit in Casteddu un’istùdiu fotogràficu in paris cun su frade. Est su primu passu de sa carriera sua.
Sa fotografia de Pes si movet intre crònaca e anàlisi sotziale, intre documentatzione e crìtica. Professionista e intelletuale militante, Pes torrat s’imàgine de una tzitade e de una Sardigna signadas dae cambiamentos profundos: modernidade e connotu, progressu e economia de fàmene. Casteddu no est una cartulina ma una tzitade castiada in su mentras de tensiones sotziales e echilìbrios fràgiles, chi bessit a campu comente a organismu biu. Pes ponet un’atentzione particulare a su tema de su traballu, sutaliniende su de is fèminas.
Sa mustra, prus de 200 fotografias, rapresentat su momentu prus de importu de su progetu “Mario Pes in progress”, giai presentadu in s’Ispàtziu Ilisso de Nùgoro e chi, in is ùrtimos meses, at postu a su tzentru de s’atentzione una figura crae de sa cultura visiva de su de binti sèculu a traessu de una sèrie de addòbios editoriales.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
