Su Cagliari Calcio at presentadu su cumpletu de trasferta 2025–26, batijadu “Ai sardi”, unu nùmene chi remonat s’òpera famada de Costantino Nivola, s’artista de Oranu contadu intre is figuras prus rapresentativas de s’arte sarda de su Noighentos.
Su disinnu de sa màllia est una rielaboratzione de sa litografia originale de Nivola, e aunit is temas de sa memòria, de s’identidade e de s’orgòlliu de is sardos. In mesu si bient is tifosos casteddajos in is ispaltos, imàgine simbòlica de su ligàmene fungudu intre sa Sardigna e s’iscuadra sua. In is mànigas, unos cantos pitogramas chi regordant s’istile iscultòreu modernista de s’artista oranesu.
Realizada dae EYE Isport cun materiales ritziclados tzertificados, in su collete portat su disegnu de acàpios postos a rughe in ammentu de sa divisa istòrica de s’iscudetu, sa de su campionadu 1969–70: ruju a intro e asulu a foras. A s’internu, si leghet s’iscrita “Cagliari Calcio”, mentras in parte arta de s’ischina si ddoe tenet su ditzu “Ovunque tu sarai”. In fundu a sa màllia, is coordinadas de su tzentrucampu de s’Unipol Domus, chi rapresentat su ligàmene intre arte, geografia e istòria de su tzìrculu isportuvu sardu.
De s’idea de concordare sa màllia de su Casteddu ispirende·si a s’òpera de Costantino Nivola, nd’at allegadu in unu contributu vìdeu, publicadu in is canales sotziales, Luca Cheri, diretore de su Museu Nivola, chi at ispiegadu s’essèntzia de s’òpera “Ai sardi”, sa gènesi artìstica sua e su cuntestu culturale acanta est nàschida. Cheri at fatu cumprèndere comente su Museu Nivola no est petzi unu bardianu de s’òpera de s’artista, ma s’insertat in manera armoniosa in su cuntestu territoriale de Orane, rapresentende s’essèntzia de sa cultura sarda fata de raighinas fungudas e mirada internatzionale. Gasi comente su Casteddu incarnat s’ispìritu e s’identidade de totu ìsula, su museu devenit unu puntu de riferimentu culturale chi contat sa Sardigna a su mundu, unende traditzione e cuntemporaneidade.
Sa divisa noa at debutadu in manera ufitziale durante su Trofeu Gigi Riva, in sa partida amistosa contra su Saint-Étienne, bìnchida 1-0 dae is sardos.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
