“Eliminacode Aou Casteddu”. Custu est su nùmene de s’aplicatzione pro sos telefoneddos Android e Apple chi cunsentit de prenotare varios servìtzios a sos ispidales Policlìnicu Duilio Casula e a su San Giovanni di Dio de Casteddu.
S’app, chi est giai a disponimentu, est ativa pro sos addòbios dae su primu de su mese de cabudanni 2025. In prus, pro chi preferit impreare su computer, b’at disponìbile una prataforma dedicada atzessìbile dae su giassu www.aoucagliari.it.
Cun “Eliminacode Aou Casteddu” sos tzitadinos podent prenotare un’addòbiu pro su ritiru de sas meighinas in sa Potecaria de su Policlìnicu Duilio Casula, prenotare un’addòbiu pro sos prelievos e sas fainas de Laboratòriu, cuncordare un’addòbiu pro prenotare sas bìsitas a traessu de su Cup e su pagamentu de su ticket de sas prestatziones, prenotare su ritiru de sas cartelleddas clìnicas e fissare un’addòbiu cun su Cup pro pagare e prenotare una bìsita de lìbera professione.
S’impreu de s’App, faghet ischire s’Aou de Casteddu, est simpre: non b’at bisòngiu de si registrare ma pro cada addòbiu tocat compilare unu mòdulu in lìnia insertende sos datos anagràficos, su nùmeru de telèfonu e s’indiritzu de curreu eletrònicu.
In su casu de esàmenes e bìsitas ispetzialìsticas – si lu si tenet a disponimentu – si podet fintzas insertare su còdighe de s’impegnativa eletrònica, chi cunsentit de atzelerare sas protzeduras a s’isportellu ticket.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
